2 րոպեի ընթերցում
ԵՐԵՎԱՆ, 30 ՍԵՊՏԵՄԲԵՐԻ, ԱՐՄԵՆՊՐԵՍ: Հայաստանի կառավարության տրամադրած կեցավայրերից արդեն օգտվել է Լեռնային Ղարաբաղից բռնի տեղահանված 32 հազար 200 քաղաքացի:
«Արմենպրես»-ի փոխանցմամբ՝ այս մասին «Հումանիտար կենտրոն»-ում ասուլիսում հայտարարեց ՀՀ վարչապետի մամուլի քարտուղար Նազելի Բաղդասարյանը:
Նա հիշեցրեց, որ կառավարությունն այս պահին բոլորին առաջարկում է անվճար կեցավայրեր, որոնք կլինեն կարճաժամկետ, որից հետո արդեն համապատասխան ծրագրով նախատեսվում են երկարաժամկետ և միջնաժամկետ ծրագրեր՝ բնակեցման հետ կապված:
«Եթե նախօրեին առավոտյան ժամը 10:00-ի դրությամբ պետության կեցավայրերից օգտվել էր 20 հազար 306 անձ, ապա այսօր այդ թիվը կազմում է 32 հազար 200»,-ասաց Բաղդասարյանը:
Նա ներկայացրեց տեղաբաշխումն ըստ մարզերի. Արագածոտն՝ 1852, Արարատ՝ 7640, Արմավիր՝ 3009, Գեղարքունիք՝ 2862, Լոռի՝ 1581, Կոտայք՝ 8289, Շիրակ՝ 1317, Սյունիք՝ 2244, Վայոց ձոր՝ 1700 և Տավուշ՝ 1706:
Ադրբեջանը սեպտեմբերի 19-ից Լեռնային Ղարաբաղի դեմ լայնածավալ հարձակում էր սկսել՝ թիրախավորելով նաև քաղաքացիական ենթակառուցվածքներ, խաղաղ բնակիչներին: Զոհվել և վիրավորվել էին նաև քաղաքացիական անձինք: Սեպտեմբերի 20-ին ԼՂ իշխանություններն ընդունեցին ռուսական խաղաղապահ առաքելություն իրականացնող զորակազմի հրամանատարության առաջարկությունը՝ կրակի դադարեցման վերաբերյալ: Սեպտեմբերի 21-ին Եվլախում կայացավ Լեռնային Ղարաբաղի և Ադրբեջանի ներկայացուցիչների հանդիպումը: Սեպտեմբերի 25-ին Իվանյանում (Խոջալու) տեղի ունեցավ Լեռնային Ղարաբաղի և Ադրբեջանի ներկայացուցիչների երկրորդ հանդիպումը, իսկ սեպտեմբերի 29-ին Եվլախում կայացավ արդեն երրորդ հանդիպումը: Վերջին օրերին Լեռնային Ղարաբաղից ՀՀ են տեղափոխվում բռնի տեղահանված քաղաքացիներ: Սեպտեմբերի 30-ի վերջին թարմ տվյալով՝ Լեռնային Ղարաբաղից Հայաստան ժամանած բռնի տեղահանվածների թիվը հասել է 100 հազար 417-ի: