ՌԴ խաղաղապահ առաքելությունը չի ապահովել հայերի խաղաղ գոյությունը Լեռնային Ղարաբաղում․ Մարուքյան

ԵՐԵՎԱՆ, 25 ՍԵՊՏԵՄԲԵՐԻ, ԱՐՄԵՆՊՐԵՍ։ Այս պահին Լեռնային Ղարաբաղի հայերը հազարներով տարհանվում են Հայաստան։ «Արմենպրես»-ի հաղորդմամբ՝ այս մասին X-ի իր միկրոբլոգում գրել է ՀՀ հատուկ հանձնարարություններով դեսպան Էդմոն Մարուքյանը։

As of now, the Armenians of Nagorno Karabakh are being evacuated by thousands to Armenia. Why are these people evacuated? Because on September 19, Azerbaijan carried out military aggression against the peaceful people of Nagorno Karabakh, as a result of which, not only hundreds… pic.twitter.com/5V8YjvjdSt

— Edmon Marukyan (@edmarukyan) September 25, 2023

Նրա խոսքով՝ այդ մարդիկ տարհանվում են, որովհետև սեպտեմբերի 19-ին Ադրբեջանը ռազմական ագրեսիա իրականացրեց Լեռնային Ղարաբաղի խաղաղ բնակչության դեմ, որի հետևանքով ոչ միայն հարյուրավոր զոհեր և վիրավորներ եղան, այլև հազարավոր խաղաղ բնակիչներ կորցրեցին իրենց տները, գյուղերն ու համայնքները:

«Այլ կերպ ասած՝ Լաչինի միջանցքի ապօրինի շրջափակման պատճառով և սեպտեմբերի 19-ի ագրեսիայից հետո բնակչությունը 9 ամիս սովի է մատնվել։ Նրանք բռնի տեղահանվել են իրենց տներից, և նկուղներում 6 օր քնելուց, սոված և ծարավ մնալուց հետո նրանց հնարավորություն չի տրվել վերադառնալ իրենց տները, այլ՝ տարհանվել են իրենց նախնիների երկրից։

Մենք ընդունում ենք, որ ՌԴ խաղաղապահ առաքելությունը չի ապահովել նրանց խաղաղ գոյությունը Լեռնային Ղարաբաղում ՝ 2020 թվականի նոյեմբերի 9-ի եռակողմ հայտարարության հիման վրա։ Մենք ընդունում ենք, որ ԵՄ-ն, ԱՄՆ-ն և մյուս բոլոր միջազգային սուբյեկտները չեն կարողացել ապահովել Լեռնային Ղարաբաղի հայերի իրավունքներն ու անվտանգության երաշխիքները՝ չնայած այն հանգամանքին, որ այդ սուբյեկտներն իրենց միջնորդական ջանքերի ընթացքում բազմիցս հայտարարել են, որ Լեռնային Ղարաբաղի հայերի իրավունքներն ու անձեռնմխելիությունը պետք է երաշխավորվեն միջազգային մեխանիզմների շրջանակներում, ինչը թույլ կտա նրանց ապահով ապրել իրենց նախնիների հողերում»,- գրել է Մարուքյանը։