ԵՄ-ում Վրաստանին կոչ են արել համագործակցել Ռուսաստանի դեմ պատժամիջոցների պահպանման հարցում
2 րոպեի ընթերցում
ԵՐԵՎԱՆ, 8 ՍԵՊՏԵՄԲԵՐԻ, ԱՐՄԵՆՊՐԵՍ: Եվրամիությունը ցանկանում է Ուկրաինային աջակցելու հարցում սերտորեն համագործակցել գործընկերների, այդ թվում՝ Վրաստանի հետ: «Արմենպրես»-ի փոխանցմամբ՝ այս մասին հայտարարել է եվրոպական դիվանագիտության ղեկավար Ժոզեպ Բորելը, որն այցով գտնվում է Վրաստանում:
Բորելը հայտնել է, որ ԵՄ-ն «աջակցում է և կաջակցի Ուկրաինային, որքան դա անհրաժեշտ լինի»։
«Մենք և մեր գործընկերները սերտորեն աշխատում ենք Ռուսաստանին մեկուսացնելու ուղղությամբ և ողջունում համագործակցությունը սահմանված պատժամիջոցների պահպանման հարցում», - վկայակոչում է «Интерфакс»-ը Բորելի խոսքերը Վրաստանի վարչապետ Իրակլի Ղարիբաշվիլիի հետ Թբիլիսիում կայացած համատեղ մամուլի ասուլիսում։
Բորելն ընդգծել է, որ Վրաստանը, որպես Եվրամիության գործընկեր, պետք է սերտորեն համագործակցի նաև Ռուսաստանի դեմ սահմանված պատժամիջոցների պահպանման հարցում։
ԵՄ դիվանագիտության ղեկավարն ափսոսանք է հայտնել Ռուսաստանի և Վրաստանի միջև օդային հաղորդակցության վերականգնման կապակցությամբ։
Դրա հետ մեկտեղ նա նշել է, որ Վրաստանը և վրաց ժողովուրդը կարող են ակնկալել Եվրամիության աջակցությունը եվրաինտեգրման ճանապարհին։
Ղարիբաշվիլին իր հերթին ասել է, որ Վրաստանը լիովին կիսում է ԵՄ-ի և միջազգային հանրության մոտեցումներն Ուկրաինային հուզող հարցերի վերաբերյալ։
Վարչապետը նաև մեկնաբանել է Ռուսաստանի և Վրաստանի միջև ավիահաղորդակցության վերականգնումը։
«Մենք ավելի վաղ պարզաբանումներ ենք արել, որ պատժամիջոցների տակ գտնվող ոչ մի ռուսական ավիաընկերություն և ոչ մի ինքնաթիռ չի գործում կամ թռչում Վրաստան, այնպես որ, այս հարցում ևս մենք գործում ենք մաքուր ու թափանցիկ», - ասել է Վրաստանի վարչապետը։
Նրա խոսքով՝ Վրաստանը վերջին տարիներին հաջողությամբ զարգանում է տնտեսապես։