Արմավիրի մարզի Դալարիկ գյուղում այրվել է մոտ 600 հակ անասնակեր

ԵՐԵՎԱՆ, 13 ՕԳՈՍՏՈՍԻ, ԱՐՄԵՆՊՐԵՍ: Արմավիրի մարզային փրկարարական վարչության ճգնաժամային կառավարման կենտրոնն օգոստոսի 13-ին, ժամը 01:22-ին ահազանգ է ստացել, որ Դալարիկ գյուղում այրվում է խոտի դեզ։

Ինչպես «Արմենպրես»-ին տեղեկացրին ՀՀ ներքին գործերի նախարարության փրկարար ծառայությունից, դեպքի վայր է մեկնել ՆԳՆ ՓԾ մարզային փրկարարական վարչության հրշեջ-փրկարարական ջոկատի մեկ մարտական հաշվարկ:

Ըստ աղբյուրի՝ պարզվել է, որ Դալարիկ գյուղի Կոմիտասի փողոցի շենքերից մեկի մոտակայքում այրվում է մոտ 300 հակ պահեստավորած անասնակեր:

Հրդեհը մեկուսացվել է ժամը 02:05-ին, մարվել՝ 05:11-ին։ Այրվել է մոտ 600 հակ կուտակած անասնակեր։

Նշվում է, որ հրդեհաշիջման աշխատանքներին մասնակցել են նաև ազատ հերթափոխից չորս հրշեջ-փրկարար և ներգրավվել JCB մակնիշի երկու տրակտոր: