Գերմանացի պաշտոնյաները դատապարտում են Ադրբեջանի կողմից Լաչինի միջանցքի արգելափակումը՝ կոչ անելով անհապաղ բացել այն

ԵՐԵՎԱՆ, 28 ՀՈՒԼԻՍԻ, ԱՐՄԵՆՊՐԵՍ։ Գերմանացի պաշտոնյաները կոչ են անում անհապաղ բացել Լաչինի միջանցքը, որն ամբողջությամբ արգելափակվել է Ադրբեջանի կողմից` հարուցելով հումանիտար ճգնաժամ Լեռնային Ղարաբաղում։ «Արմենպրես»-ի փոխանցմամբ՝ գերմանացի պաշտոնյաները այս մասին հրապարակումներ են արել «Թվիթեր»-ի իրենց պաշտոնական էջերում։

«Լաչինի միջանցքը պետք է բացվի։ Այն, որ նույնիսկ Կարմիր խաչի միջազգային կոմիտեի կողմից տրամադրվող մարդասիրական օգնությունը Հայաստանից Լեռնային Ղարաբաղ տեղափոխելը անհնար է դարձել, անընդունելի է։ Անհրաժեշտ է ճնշում գործադրել Ադրբեջանի նկատմամբ, որպեսզի իրավիճակը ավելի չլարվի»,- գրել է Բունդեսթագի Մարդու իրավունքների հանձնաժողովի նախագահ Ռենատա Ալտը։

ԳԴՀ կառավարության՝ Հարավային Կովկասի, Մոլդովայի և Կենտրոնական Ասիայի հետ միջհասարակական համագործակցության հարցերով համակարգող, Բունդեսթագի պատգամավոր, ԵԱՀԿ ԽՎ-ում Բունդեսթագի պատվիրակության ղեկավար Ռոբին Վագեները նշել է, որ խորը մտահոգությամբ է հետևում Լեռնային Ղարաբաղում հումանիտար իրավիճակին: «Բոլոր գործողությունների հիմքում պետք է լինի տեղի բնակչության բարեկեցությունը, որով և պետք է առաջնորդվել: Այն ներառում է մարդկանց և ապրանքների տեղափոխման բոլոր ուղիների՝ ներառյալ Լաչինի միջանցքի անխափան և անվտանգ լինելու երաշխիքը»,- գրել է Ռոբին Վագեները:

Բունդեսթագի պատգամավոր, արտաքին հարաբերությունների հանձնաժողովի անդամ, Կանաչների խմբակցության Հարավային Կովկասի հարցերով զեկուցող Մերլե Շպելբերգն ընդգծել է, որ, այս շաբաթվա դրությամբ, արդեն կա դրական նորություն Լեռնային Ղարաբաղի ժողովրդի համար: «Այս օգնությունը կարող է մեղմել սուր արտակարգ դրությունը: Այնուամենայնիվ, Ադրբեջանի կողմից Լաչինի միջանցքի ցանկացած շրջափակում հրատապ կերպով պետք է դադարեցվի։ Մարդկային կյանքերը աշխարհաքաղաքական լծակ չեն կարող լինել»,- նշել է նա։

Հայաստանի կառավարությունը հուլիսի 26-ին 361 տոննա հումանիտար օգնություն է ուղարկել Լեռնային Ղարաբաղ՝ 19 բեռնատար ավտոմեքենաներով: Հումանիտար օգնությունը հուլիսի 26-ին հասել է Լաչինի միջանցքի մուտքի հատված: Հայաստանը խնդրել է, որ ԼՂ-ում տեղակայված ՌԴ խաղաղապահ զորախմբի ներկայացուցիչներն ընդունեն բեռն ու տեղափոխեն ԼՂ, որտեղ Լաչինի միջանցքի շուրջ 8 ամիս ապօրինի արգելափակված լինելու հետևանքով հումանիտար ճգնաժամ է հաստատված: Բեռնատարներով Հայաստանից Լեռնային Ղարաբաղ է ուղարկվում մակարոնեղեն, շաքարավազ, բուսական յուղ, կաթի փոշի, աղ, մանկական կեր, դեղորայք: Ադրբեջանը մինչ այս պահը խոչընդոտում է մարդասիրական օգնությամբ բեռնատարների մուտքը Լեռնային Ղարաբաղ։

Ադրբեջանն անցած տարվա դեկտեմբերից արգելափակել է Արցախը Հայաստանի հետ կապող միակ ճանապարհը՝ Լաչինի միջանցքը։ Սկզբնական շրջանում միջանցքն արգելափակել էին այսպես կոչված բնապահպաններ՝ բնապահպանական կեղծ հիմնավորումներով և պահանջներով, իսկ միջանցքի երթուղին փոխելուց հետո Ադրբեջանն ապօրինի անցակետ տեղադրեց միջանցքում՝ խոչընդոտներ հարուցելով ազատ տեղաշարժի համար։ Սկզբնական շրջանում միջանցքով որոշակի տեղաշարժ, այնուամենայնիվ կար, ՌԴ խաղաղապահ զորակազմի միջնորդությամբ սահմանափակ քանակով մարդասիրական բեռ մտնում էր Լեռնային Ղարաբաղ, նաև Կարմիր խաչի միջազգային կոմիտեի միջոցով բուժման կարիք ունեցող անձինք տեղափոխվում էին Հայաստան և հակառակ ուղղությամբ։ Հունիսի 15-ից Ադրբեջանն ամբողջությամբ արգելափակել է Լաչինի միջանցքը։ Արդեն 40 օր է՝ ոչ մի կիլոգրամ սնունդ Արցախ չի մտել։