ԱՍՀ նախարարությունը և ՀՕՖ-ի «Երեխաների պաշտպանության կենտրոն»-ը համագործակցության համաձայնագիր են ստորագրել
2 րոպեի ընթերցում
ԵՐԵՎԱՆ, 21 ՀՈՒՆԻՍԻ, ԱՐՄԵՆՊՐԵՍ: Կարևորելով երեխայի՝ ընտանիքում ապրելու իրավունքի իրացումը և այդ համատեքստում երեխաների՝ ընտանիքների հետ վերամիավորման, ինչպես նաև խնամատարության զարգացման ուղղությամբ աշխատանքների կատարելագործումը՝ համաձայնագիր է ստորագրվել Աշխատանքի և սոցիալական հարցերի նախարարության և Հայ օգնության ֆոնդի «Երեխաների պաշտպանության կենտրոն»-ի միջև։
Ինչպես «Արմենպրես»-ին տեղեկացրին ՀՀ աշխատանքի և սոցիալական հարցերի նախարարությունից, օգտագործելով նախարարության և հիմնադրամի ներուժը՝ կողմերը համագործակցելու են երեխաների հիմնահարցերի ոլորտի բարելավմանն ուղղված ծրագրերի, մասնավորապես, երեխաների՝ իրենց կենսաբանական կամ հարազատ ընտանիքների հետ վերամիավորման, խնամատար ինստիտուտի զարգացման, բռնության ենթարկված երեխաների պաշտպանության կազմակերպման և այլ ուղղություններով։
Ըստ աղբյուրի՝ համաձայնագրի շրջանակում մշակվելու են խնամատար ծնող դառնալ ցանկացող անձանց վերապատրաստման դասընթացի մոդուլներ, ընտանիքի և աջակցության կենտրոնների շուրջօրյա բաղադրիչում խնամք ստացող երեխաների՝ ընտանիքների հետ վերամիավորման աշխատանքների մեթոդական ուղեցույցներ։
Նշվում է, որ կողմերը ևս մեկ անգամ ընդգծել են կառուցողական և շարունակական փոխգործակցության դերը՝ կյանքի դժվարին իրավիճակում հայտնված երեխայի՝ ընտանիքում ապրելու իրավունքի իրացման գործում։