Ոստիկանները բացահայտել են Երևանի Բաղրամյան պողոտայում կատարված սպանությունը

ԵՐԵՎԱՆ, 13 ՀՈՒՆԻՍԻ, ԱՐՄԵՆՊՐԵՍ: Ոստիկանության Քրեական ոստիկանության գլխավոր և Երևան քաղաքի վարչությունների, ինչպես նաև Արաբկիրի բաժնի ծառայողների համատեղ ձեռնարկած միջոցառումների արդյունքում հունիսի 6-ին Երևանի Բաղրամյան պողոտայում սպանություն կատարած 25-ամյա երիտասարդը հունիսի 13-ին հայտնաբերվել, սպանություն կատարելու հիմնավոր կասկածի հիման վրա ձերբակալվել և տեղափոխվել է ոստիկանության Արաբկիրի բաժին, որտեղից էլ ներկայացվել է վարույթն իրականացնող մարմին: «Արմենպրես»-ին այս մասին տեղեկացրին ՀՀ ներքին գործերի նախարարության ոստիկանությունից։

«Հունիսի 6-ին, ժամը 22.07-ին, ոստիկանություն հաղորդում էր ստացվել, որ շտապօգնության խումբը կանչով մեկնել է Բաղրամյան պողոտայի 49/2 հասցե, որտեղ տղամարդու դիակ է եղել։

Դեպքի վայր մեկնած օպերատիվ-քննչական խումբը նշված հասցեում հայտնաբերել էր 35-ամյա Վարազդատ Գասպարյանի դիակը՝ գլխի շրջանում հրազենային վնասվածքով:

Ձեռնարկված ծավալուն օպերատիվ-հետախուզական միջոցառումների արդյունքում պարզվել է, որ ժամը 22.00-ի սահմաններում Բաղրամյան պողոտայի վերոհիշյալ հասցեի մոտակայքում Երևանի Նար-Դոսի փողոցի 25-ամյա բնակիչը իր մոտ ապօրինի պահվող, դեռևս չպարզված հրազենով կրակոցներ է արձակել Վարազդատ Գասպարյանի ուղղությամբ, որը մահացել է:

Դեպքի առթիվ նախաձեռնվել էր քրեական վարույթ»,- ասվում է հաղորդագրության մեջ։

Ըստ աղբյուրի՝ ձեռնարկված միջոցառումների արդյունքում պարզվել է, որ հունիսի 6-ին Նար-Դոսի փողոցի 25-ամյա բնակիչը, դեռևս չպարզված հարցի շուրջ անհամաձայնություններ ունենալով Վարազդատ Գասպարյանի հետ և նախապես պլանավորելով սպանել նրան, երեկոյան ժամը 8-ի սահմաններում որպես տաքսի շահագործվող «Օպել»

մակնիշի մեքենայով գնացել է Երևան քաղաքի Ջեյմս Բրայսի փողոց, որտեղ դարանակալել է և հարմար պահն օգտագործելով՝ կրակել ու սպանել է Վարազդատ Գասպարյանին:

Նշվում է, որ ՀՀ ԱԳՆ ոստիկանության Քրեական ոստիկանության գլխավոր և Երևան քաղաքի վարչությունների, ինչպես նաև Արաբկիրի բաժնի ծառայողների համատեղ ձեռնարկած միջոցառումների արդյունքում հունիսի 13-ին 25-ամյա երիտասարդը հայտնաբերվել, սպանություն կատարելու հիմնավոր կասկածի հիման վրա ձերբակալվել և տեղափոխվել է ոստիկանության Արաբկիրի բաժին, որտեղից էլ ներկայացվել է վարույթն իրականացնող մարմին:

Ենթադրյալ հանցանքի մեջ կասկածվողը կամ մեղադրվողը համարվում է անմեղ, քանի դեռ նրա մեղավորությունն ապացուցված չէ ՀՀ քրեական դատավարության օրենսգրքով սահմանված կարգով` դատարանի` օրինական ուժի մեջ մտած դատավճռով: