Իտալական ներդրումների ծավալները Հայաստանում աճում են. ՀՀ վարչապետը շնորհավորել է Ջորջա Մելոնիին
2 րոպեի ընթերցում
ԵՐԵՎԱՆ, 2 ՀՈՒՆԻՍԻ, ԱՐՄԵՆՊՐԵՍ: Հայաստանի Հանրապետության վարչապետ Նիկոլ Փաշինյանը շնորհավորական ուղերձ է հղել Իտալիայի Հանրապետության Նախարարների խորհրդի նախագահ Ջորջա Մելոնիին՝ ազգային տոնի առթիվ: «Արմենպրես»-ի փոխանցմամբ՝ ուղերձում, մասնավորապես, ասված է
«Ձերդ գերազանցություն,
Հայաստանի Հանրապետության կառավարության և հայ ժողովրդի անունից ջերմորեն շնորհավորում եմ Ձեզ և Իտալիայի բարեկամ ժողովրդին ազգային տոնի՝ Հանրապետության օրվա կապակցությամբ։
Հայ-իտալական համագործակցությունն աչքի է ընկնում բարձր մակարդակի քաղաքական երկխոսությամբ։ Գոհունակությամբ եմ արձանագրում, որ տարեցտարի աճում են երկկողմ առևտրաշրջանառության, ինչպես նաև իտալական ներդրումների ծավալները Հայաստանում։ Հայաստանը վճռական է Իտալիայի հետ տնտեսական հարաբերությունները հասցնել քաղաքական երկխոսության մակարդակին։
Կարևորում ենք Իտալիայի հետ փոխգործակցությունը թե՛ երկկողմ, թե՛ բազմակողմ հարթակներում, ներառյալ՝ համագործակցությունը ԵՄ շրջանակում:
Վստահ եմ, որ համատեղ ջանքերով կնպաստենք հայ-իտալական ավանդական բարեկամական հարաբերությունների ամրապնդմանը։ Լիահույս եմ, որ մոտ ապագայում առիթ կունենանք հանդիպելու՝ քննարկելու փոխադարձ հետաքրքրություն ներկայացնող բոլոր օրակարգային հարցերը, ինչպես նաև նախանշելու երկկողմ համագործակցության նոր հեռանկարներ:
Մաղթում եմ Ձեզ նորանոր հաջողություններ Ձեր պատասխանատու առաքելությունն իրականացնելիս, իսկ Իտալիայի բարեկամ ժողովրդին՝ խաղաղություն և բարեկեցություն»։