3 րոպեի ընթերցում
ԵՐԵՎԱՆ, 31 ՄԱՅԻՍԻ, ԱՐՄԵՆՊՐԵՍ: Հայկական արտադրության MetaGait-ը քայլքի իմիտացիա ստեղծելով՝ վերականգնում է հաշմանդամություն ունեցող անձանց շարժունակությունը։
Ինչպես «Արմենպրես»-ին տեղեկացրին «Ստեփան Գիշյան» բարեգործական հիմնադրամիից, վերականգնողական սարքը վիրտուալ իրականության ակնոցով և հատուկ մշակված ծրագրով բուժառուին տեղափոխում է տարբեր միջավայրեր, որտեղ նրանք քայլում են։
MetaGait-ի հեղինակը «Քայլտեք» ընկերությունն է, որը միավորում է մի խումբ մասնագետների՝ կինեզիստների, նյարդաբանների, թերապևտների, ինժեներների, ովքեր հենաշարժողական խնդիրներ ունեցողների համար ստեղծում են նորարար սարքեր։
MetaGait սարքը ընկերության նախորդ արտադրանքի՝ «Քայլաբերի» կատարելագործված տեսակն է։
«Քայլտեք» ընկերությունը «Ստեփան Գիշյան» բարեգործական հիմնադրամի ամենամյա դրամաշնորհային ծրագրի հաղթողներից է։ MetaGait-ի սարքերից մեկը հիմնադրամի աջակցությամբ ձեռք է բերվել Հայաստանի ֆիզիկական կուլտուրայի և սպորտի պետական ինստիտուտի լաբորատորիայի համար, որտեղ կատարվելու են գիտական հետազոտություններ։
«Ծրագիրն առնչվում է ոչ միայն առողջապահական, այլ նաև գիտակրթական ոլորտին։ Այստեղ դասախոսական կազմի և ուսանողների կողմից MetaGait սարքն օգտագործվում է որպես փորձարարական գիտահետազոտական սարք, որի միջոցով պետք է մշակեն մեթոդաբանություն, որն էլ հետագայում հնարավորություն կտա ավելի էֆեկտիվ իրականացնել վերականգնողական թերապիաները»,- նշել է «Ստեփան Գիշյան» բարեգործական հիմնադրամի տնօրեն Աննա Գիշյանը։
«MetaGait-ը պատենտավորված է 157 երկրում և համարվում է նորարարություն: MetaGait-ի միջոցով հենաշարժողական խնդիրներ ունեցող անձինք, հայտնվելով տարբեր միջավայրերում, քայլում են, տեսնում իրենց քայլվածքը։ Հիմա մենք գիտական ուսումնասիրություն ենք անում, հետազոտում ենք ուղեղի փոփոխությունները։ Սովորաբար, ուղեղի շարժողական կենտրոնները ինֆորմացիա չստանալով՝ սկսում են ապաճել։ Մենք տեսողականից ինֆորմացիա ենք ուղարկում ուղեղին։ Ուսումնասիրության արդյունքում կտեսնենք՝ դրական ինչ տեղաշարժեր են լինում»,- նշում է «Քայլտեք» ընկերության հիմնադիր Դավիթ Արսենյանը։
Հեռավար վերականգնողական բուժման համար գործարկվել է նաև MetaGait-ի հավելվածը, որը ցույց է տալիս բուժառուների ցուցանիշները, վերականգնողական դինամիկան, որն էլ օգնում է ավելի արդյունավետ կազմակերպել մեթոդաբանությունն ու բուժման գործընթացը։
«Ստեփան Գիշյան» բարեգործական հիմնադրամը ստեղծվել է Ակբա բանկի, ֆրանսիական Կրեդիտ Ագրիկոլ, Կրեդիտ Ագրիկոլ Ազգային Ֆեդերացիայի և Գիշյան ընտանիքի կողմից: Հիմնադրամի ծրագրերը ուղղված են հայ-ֆրանսիական կապերի ամրապնդմանը, Հայաստանի սոցիալ-տնտեսական, գիտակրթական, մշակութային, առողջապահական համակարգերի բարելավմանն ու կատարելագործմանը:
Մանրամասն՝ տեսանյութում։