368.52
Գնել Սանոսյանը չի բացառում, որ այս տարի Սևանա լճից լրացուցիչ ջուր վերցնելու կարիք լինի
1 րոպեի ընթերցում
ԵՐԵՎԱՆ, 24 ՄԱՅԻՍԻ, ԱՐՄԵՆՊՐԵՍ։ Տարածքային կառավարման եւ ենթակառուցվածքների նախարար Գնել Սանոսյանը չի բացառում, որ այս տարի Սևանա լճից լրացուցիչ ջուր վերցնելու կարիք լինի։ Ինչպես տեղեկացնում է «Արմենպրես»-ը, Գնել Սանոսյանն այս մասին ասաց Ազգային ժողովում Կառավարության անդամների հետ հարց ու պատասխանի ժամանակ։
Նա տեղեկացրեց, որ այս պահին բավական բարդ ու ծանր իրավիճակ է ստեղծվել ոռոգման համակարգում։ Նախարարի խոսքով՝ հիմնականում խնդիր ունեն Ախուրյանի, Ազատի, Ապարանի ու Մարմարիկի ջրամբարները, այսինքն` այն խոշոր ջրամբարները, որոնք սնուցում են համակարգը ջրի պակաս ունեն։
Նախարարը նշեց, որ այսօրվա դրությամբ այդ պակասը արդեն 250 մլն մետր խորանարդի է հասնում։
«Ցավալի է, որ հատկապես Սևանի իջման գոտում կարիք կունենանք Սևանից լրացուցիչ ջուր վերցնելու և հավանաբար Ազգային ժողովին այդ խնդրանքով կդիմենք։ Դեռ որոշակի հաշվարկներ են արվում, թե ինչ ծավալի մասին է խոսքը»,- ասաց նա։
Նախարարը վստահեցրեց, որ դժվարությամբ, բայց կառավարությունը կկարողանա կառավարել այս գործընթացը։
«Մենք ինչքան հնարավոր է ավելի շատ կաշխատեցնենք պոմպակայանները, չխնայելով որևէ դրամ կամ էլեկտրաէներգիա, որպեսզի Սևանից քիչ ջրառ իրականացնենք»,– ասաց նա։
Բաժանորդագրվեք մեր ալիքին Telegram-ում