Ընդդիմությունը պատրաստվում է պայքարի նոր փուլ սկսել վարչապետ Նիկոլ Փաշինյանի հայտարարությունից հետո

ԵՐԵՎԱՆ, 23 ՄԱՅԻՍԻ, ԱՐՄԵՆՊՐԵՍ։ «Հայաստան» խմբակցության պատգամավոր Իշխան Սաղաթելյանը հայտարարեց, որ ընդդիմությունը չի պատրաստվում համակերպվել վարչապետ Նիկոլ Փաշինյանի այն հայտարարության հետ, որ Հայաստանը պատրաստ է ճանաչել Ադրբեջանի 86.6 հազար քկմ տարածքային ամբողջականությունը, որը ներառում է նաև Լեռնային Ղարաբաղը։ Սաղաթելյանը նշեց, որ ընդդիմությունը պատրաստվում է պայքարել մինչև վերջ։

«Հայաստանի բոլոր քաղաքացիները, քաղաքական ուժերը ունեն ընդամենը 5-6 ամիս ժամանակ։ Այս իրավիճակի հետ չենք համակերպվելու, չենք հանձնվելու, պայքարելու ենք մինչև վերջին շունչը»,- ասաց Սաղաթելյանը՝ վստահեցնելով, որ իրականության հետ որևէ կապ չունեն այն խոսակցությունները, որ ընդդիմությունը հեռացել է իր օրակարգից, պայքարը դադարել է։

Նրա խոսքով՝ ընդդիմության խնդիրն է նոր թափով, նոր ուժով Հայաստանում և սփյուռքում ձևավորել համաժողովրդական դիմադրություն՝ Հայաստանի Հանրապետության քաղաքացիներին պատրաստել լայն համաժողովրդական անհնազանդության։

«Դաշնակցությունը ունի իր պատկերացումները և փողոցային պայքարի և առաջիկա անելիքների վերաբերյալ։ Մենք մեր առաջարկները կքննարկենք մեր գործընկերների հետ։ Հստակ է՝ ինչ է անում Նիկոլ Փաշինյանը, և հստակ է նրա ժամանակացույցը։ Ընդդիմությունը ևս պետք է հստակեցնի իր ժամանակացույցը ու գործողությունները և պայքարը շարունակի»,- ասաց Սաղաթելյանը՝ հավելելով, որ մինչև այդ Հայաստանում և Արցախում պետք է լինեն բողոքի ակցիաներ և ցույցեր։