2 րոպեի ընթերցում
ԳՅՈՒՄՐԻ, 21 ՓԵՏՐՎԱՐԻ, ԱՐՄԵՆՊՐԵՍ: Գյումրիում փետրվարի 21-ին բացվեց Կամերային երաժշտության դահլիճը: Ինչպես տեղեկացնում է «Արմենպրես»-ը, դահլիճը բացվել և գործելու է Գյումրու թիվ 4 երաժշտական դպրոցի շենքում:
Դահլիճի բացման առթիվ բեմում էին Գյումրու պետական երաժշտական խմբերը, դպրոցական, միջին մասնագիտական և բարձրագույն երաժշտական հաստատությունների ներկայացուցիչները։
Լրագրողներին ներկայացնելով կամերային դահլիճ ունենալու անհրաժեշտությունը՝ Գյումրու քաղաքապետարանի Մշակույթի եւ երիտասարդության հարցերի բաժնի պետ Լիլիթ Թովմասյանը նշեց, որ դրա անհրաժեշտությունը տարիներ շարունակ զգացվում էր: «Ճիշտ է՝ նոր շենք կառուցելու հնարավորություն քաղաքը չուներ, բայց եղածը վերանորոգելու ու որպես կամերային դահլիճ հարմարեցնելու համար համայնքային բյուջեից գումարներ գտնվեցին»,- ասաց նա:
Դահլիճի վերապրոֆիլավորման, նորոգման և վերազինման համար համայնքային բյուջեից 3 փուլով հատկացվել է 33 միլիոն դրամ՝ արդյունքում ստացվել է դասական երաժշտության համերգների կազմակերպման հարթակ, որն ունի ժամանակակից միջավայր, պրոֆեսիոնալ չափանիշներին համապատասխան լուծումներ, նվագախմբերի ու երգչախմբերի պահանջները բավարարող ընդարձակ բեմահարթակ: «Ես վստահ եմ, որ այստեղ ելույթ են ունենալու հայ և համաշխարհային ճանաչում ունեցող այնպիսի երաժիշտներ, ովքեր հրաժարվում էին ելույթ ունենալ քաղաքում դահլիճի բացակայության պատճառով: Այսօրվանից շրջադարձային ձևով փոխվելու է քաղաքի մշակութային կյանքը»,-նշեց Լիլիթ Թովմասյանը՝ հավելելով, որ Գյումրու կամերային երաժշտության դահլիճը կսպասարկի քաղաքի բոլոր՝ դպրոցական, միջին մասնագիտական, բարձրագույն մասնագիտական կրթության օղակների կարեւորագույն համերգները, կընդունի հայ և արտասահմանյան հայտնի երաժիշտների ու երաժշտական նվագախմբերի, պատշաճ միջավայրում կանցկացնի երաժշտական մասշտաբային փառատոներ, որակական նոր նշաձող կսահմանի քաղաքում դասական երաժշտության համերգների կազմակերպման ոլորտում։