Հայաստանի պատմության և Էրեբունի պատմահնագիտական թանգարանների ցուցանմուշները կներկայացվեն Բրիտանական թանգարանում
1 րոպեի ընթերցում
ԵՐԵՎԱՆ, 22 ՓԵՏՐՎԱՐԻ, ԱՐՄԵՆՊՐԵՍ: Հայաստանի պատմության և Էրեբունի պատմահնագիտական թանգարանների ցուցանմուշները կներկայացվեն Բրիտանական թանգարանում: «Շքեղություն և ուժ. Պարսկաստանից Հունաստան» խորագրով ցուցահանդեսի բացումը սպասվում է մայիսին: «Արմենպրես»-ի մամուլի սրահում հրավիրված ասուլիսում այս մասին նշեց Հայաստանի պատմության թանգարանի տնօրեն Դավիթ Պողոսյանը:
«Նախորդ տարի Բրիտանական թանգարանի «Մերձավոր Արևելք» բաժնի ղեկավարն անձամբ եկավ թանգարան հատուկ մեր հավաքածուների ցուցադրության համար խնդրանքով: Նա հիացած էր այն եզակի ցուցանմուշներով, որոնք մեր հավաքածուներում առկա են: Հիմա աշխատում ենք Բրիտանական թանգարանի մեր գործընկերների հետ այդ մեծ ցուցահանդեսին նախապատրաստվելու համար: Բրիտանական թանգարանը մեզնից փոխառում է Աքեմենյան և անտիկ շրջանի որոշ նյութեր և այդ ցուցադրության մեջ ներկայացնում հայկական առանձնահատկությունները: Ասեմ, որ մեծ ցուցադրություն է սպասվում, բավական երկար նախապատրաստական աշխատանք է տարվել, ներկայացվելու են տարբեր երկրների հավաքածուներ»,-ասաց Դավիթ Պողոսյանը:
Այս տարվա ընթացքում սպասվում է նաև ցուցադրություն Ռուսաստանում: Թեման լինելու է ուրարտական շրջանի ժառանգությունը: