ՀԱՊԿ գլխավոր քարտուղարը ցավակցել է Նիկոլ Փաշինյանին 15 զինծառայողների ողբերգական մահվան կապակցությամբ
1 րոպեի ընթերցում
ԵՐԵՎԱՆ, 19 ՀՈՒՆՎԱՐԻ, ԱՐՄԵՆՊՐԵՍ: Հավաքական անվտանգության պայմանագրի կազմակերպության գլխավոր քարտուղար Իմանգալի Թասմագամբետովը ցավակցել է Հայաստանի վարչապետ Նիկոլ Փաշինյանին՝ 15 հայ զինծառայողների ողբերգական մահվան կապակցությամբ: «Արմենպրես»-ի փոխանցմամբ՝ այս մասին հայտնում են ՀԱՊԿ-ի մամուլի ծառայությունից:
«Հավաքական անվտանգության պայմանագրի կազմակերպության քարտուղարության և անձամբ իմ անունից անկեղծ ցավակցություն եմ հայտնում 2023 թվականի հունվարի 19 գիշերը Գեղարքունիքի մարզում բռնկված հրդեհի պատճառով Հայաստանի Հանրապետության զինված ուժերի 15 զինծառայողների մահվան կապակցությամբ: Մենք խորը վշտով ենք ընդունել զինծառայողների ողբերգական մահվան մասին լուրը: Կիսում ենք զոհերի ընտանիքների, հարազատների և մտերիմների անդառնալի կորստի ցավը և աջակցության խոսքեր ենք փոխանցում նրանց համար այս դժվար պահին: Տուժածներին և վիրավորներին մաղթում ենք շուտափույթ ապաքինում»,- ասված է ՀԱՊԿ գլխավոր քարտուղարի ուղերձում: