3 րոպեի ընթերցում
ՍՏԵՓԱՆԱԿԵՐՏ, 19 ԴԵԿՏԵՄԲԵՐԻ, ԱՐՄԵՆՊՐԵՍ: Արցախից Հայաստան տեղափոխված պացիենտին՝ 62 ամյա տղամարդուն, Ստեփանակերտի Հանրապետական բժշկական կենտրոնում իրականացրել են կորոնարոգրաֆիա, որի արդյունքում պարզվել է, որ հիվանդին պետք է ուղարկել Երևան՝ սրտի բաց վիրահատական միջամտություն իրականացնելու համար:
«Արմենպրես»-իհետ զրույցում բուժառուի մասին մանրամասներ հայտնեց Ստեփանակերտի Հանրապետական բժշկական կենտրոնի գործադիր տնօրեն Մհեր Մուսայելյանը՝ ընդգծելով, որ Նորք Մարաշ հիվանդանոցի հետ արդեն բոլոր պայմանավորվածությունները ձեռք են բերվել:
«Սակայն, երբ ճանապարհը փակվեց, բուժառուին նշանակվեց դեղորայքային բուժում տան պայմաններում, որտեղ նա սպասում էր ճանապարհների բացվելուն: Բայց նա երկար նման վիճակում չէր կարող սպասել: Կարմիր խաչից եղավ որևէ պացիենտի Երևան տեղափոխելու առաջարկ, և որոշվեց հենց սրտային պաթոլոգիայով այդ պացիենտին տեղափոխել »,- ասաց Մհեր Մուսայելյանը:
Նա նաև նշեց, որ այս պահին հիվանդանոցում ունեն ստացիոնար բուժում ստացող 92 պացիենտ, որոնցից 11-ը վերակենդանացման բաժանմունքում են:
«Եթե պացիենտները վերակենդանացման բաժանմունքում են գտնվում, չի նշանակում, որ նրանք Երևան տեղափոխվելու կարիք ունեն: Մեր կենտրոնը նորմալ աշխատել է ու շարունակում է աշխատել: Մինչև այս իրավիճակն էլ մենք շատ քիչ պացիենտների ենք ուղարկել Երևան: Ուղարկում էինք միայն նրանց, որոնց չէինք կարող մեզ մոտ անհրաժեշտ օգնություն ցուցաբերել, ինչպես այսօրվա հիվանդին, քանի որ մենք չունենք կենտրոն, որտեղ սրտի բաց եղանակով վիրահատություն են իրականացնում: Նման վիրահատություն իրականացնում են միայն Երևանում»,- ասաց նա:
Մուսաելյանի խոսքով՝ մյուս բոլոր ծանր հիվանդներին իրենք կարողանում են սպասարկել, քանի որ վերակենդանացման բաժանմունքը հագեցած է բոլոր անհրաժեշտ պարագաներով:
Նա ընդգծեց, որ, բարեբախտաբար, այս պահին դեռևս դեղորայքի պակաս չունեն, որովհետև անցել են ավելի խնայողաբար ռեժիմով աշխատանքի: «Այս պահին դեռևս իրավիճակին տիրապետում ենք, իսկ երկար շարունակվելու դեպքում, ոչ ոք չի կարող ասել, թե ինչ հետևանքներ կլինեն»,- մանրամասնեց նա: