1 րոպեի ընթերցում
ԵՐԵՎԱՆ, 14 ՆՈՅԵՄԲԵՐԻ, ԱՐՄԵՆՊՐԵՍ: Թուրքական ոստիկանությունը ձերբակալել է Ստամբուլի Բեյօղլու թաղամասի Իսթիքլալ փողոցում ռումբ տեղադրած անձին։
Այս մասին, ինչպես հաղորդում է «Արմենպրես»-ը, հայտնում է թուրքական «Անադոլու» լրատվական գործակալությունը՝ հղում անելով Թուրքիայի ներքին գործերի նախարար Սուլեյման Սոյլուին:
«Մեր գնահատականներով՝ հրամանը եկել է Քոբանիից, իսկ հարձակման հեղինակը եկել է Աֆրինից», - ասել է Սոյլուն։
Բացի այդ, պայթյունից անմիջապես հետո ոստիկանությունը ձերբակալել է 21 մարդու՝ պայթյունի հետ առնչություն ունենալու կասկածանքով։
Տեղեկության համաձայն՝ վկայությունները ցույց են տալիս, որ պայթյունը կազմակերպել է PYD-ն (YPG-ի ռազմական թևը, որը պաշտոնական Անկարայի կողմից ահաբեկչական հռչակված PKK-ի սիրիական թևն է համարվում):
Նոյեմբերի 13-ին որոտացած պայթյունի հետևանքով զոհվել է 6 մարդ, վիրավորվել՝ 81-ը։
Թուրքիայի առողջապահության նախարար Ֆահրեթին Քոջան հայտնել է, որ 81 տուժածներից 39-ն արդեն դուրս են գրվել հիվանդանոցներից։
Նախարարը հավելել է, որ հոսպիտալացվածներից հինգը գտնվում են վերակենդանացման բաժանմունքում, երկուսի վիճակը ծանր է: