«Երևանյան բեսթսելեր». «20 հեքիաթ արքայադուստրերի մասին»-ը՝ առաջատար. մանկական. օգոստոս, 2022
5 րոպեի ընթերցում
ԵՐԵՎԱՆ, 23 ՍԵՊՏԵՄԲԵՐԻ, ԱՐՄԵՆՊՐԵՍ:«Արմենպրես»լրատվական գործակալության «Երևանյան բեսթսելեր» հեղինակային նախագիծն այս շաբաթ ներկայացնում է մանկական և պատանեկան գեղարվեստական ստեղծագործությունների լավագույն տասնյակը՝ ըստ օգոստոսի վաճառքի տվյալների:
Առաջին տեղում է«20 հեքիաթ արքայադուստրերի մասին» գիրքը։«20 հեքիաթ արքայադուստրերի մասին» ժողովածուն իր մեջ ներառում է պատմություններ ամենասիրված հեքիաթային արքայադուստրերի մասին: Վառ նկարազարդումներով, գեղեցիկ ձևավորումներով այս գիրքն ասես բերված լինի հեքիաթային աշխարհից, որտեղ բնակվում են սիրված մուլտֆիլմերի ու հեքիաթների բոլոր-բոլոր հերոսները:
Խնկո Ապոր առակներն ամփոփող«Առակներ.գունավորիր ջրով»ժողովածուն երկրորդն է։ Այն երեխայի հետաքրքիր և զարգացնող ժամանցը ապահովող ջրով գունազարդվող յուրատեսակ գիրք է:
Երրորդ տեղում է«Բոքոնիկը» գիրքը:Բոքոնիկի մասին հեքիաթը հանդիպում է ռուսական և ուկրաինական բանահյուսություններում, ինչպես նաև ունի իր նմանակները շատ ժողովուրդների մոտ: Սյուժեն հանդիպում է նաև սկանդինավյան, գերմանական, ուզբեկական, թաթարական և այլ հեքիաթներում:
Չորրորդ հորիզոնականում է«Շաղգամը»հեքիաթը, որը հայտնի է բոլոր փոքրիկներին: Աթաբեկ Խնկոյանի այս ստեղծագործության ներքո որքա՜ն սերունդներ են մեծացել ու իմաստություն ձեռք բերել:
Հովհաննես Թումանյանի«Փիսիկի գանգատը» ստեղծագործությունը հինգերորդ հորիզոնականում է: Հայտնի գործն այս անգամ ներկայացվում է ինքնատիպ պատկերազարդումների և փազլի միջոցով:
Վեցերորդ տեղում է«Գայլն ու յոթ ուլիկները»գիրքը: Գրիմ եղբայրների այս հեքիաթը հրատարակվել է 1812-1815 թվականների հեքիաթների շարքում: Սյուժեն շատ հայտնի է ու պարզ, այն ծանոթ է յուրաքանչյուր փոքրիկի:
Յոթերորդ հորիզոնականում է«Ովէապրումտնակում»հեքիաթը: Հայտնի մանկագիր Վլադիմիր Սուտեևի հեղինակած և արդեն քանի-քանի սերունդների գերած ստեղծագործությունը կօգնի երեխային բացահայտել իրեն շրջապատող աշխարհը: Չէ՞ որ փոքրիկներն աշխարհին նայում են լայն բացված աչքերով: Նրանց հետաքրքիր է ամեն ինչ՝ օրինակ, ինչու է փայտփորիկը հարվածում ծառին, ինչու է սարդը սարդոստայն գործում և այլն: Այս գրքից փոքրիկ ընթերցողները կիմանան կենդանիների բնակության վայրերի մասին:
Ութերորդ տեղում է «Շունն ու կատուն»գիրքը։ Այս հեքիաթի սյուժեի մասին կարելի է ընդհանրապես չխոսել, քանի որ այն ծանոթ է յուրաքանչյուր փոքրիկի: Թումանյանական այս հեքիաթը սիրված է շատերի կողմից:
Իններորդ տեղում էՀովհաննես Թումանյանի «Չարի վերջը»բալլադը: Բալլադը պատմում է մի խորամանկ աղվեսի և միամիտ կկվի մասին. վերջինս հավատում է աղվեսի ստին և զոհաբերում իր ձագերին, որպեսզի աղվեսը չքանդի նրա բույնը: Սակայն խելացի ագռավը խորհուրդ է տալիս մի լավ դաս տալ աղվեսին: Երբ աղվեսը նորից գալիս է, կկուն քշում է նրան: Աղվեսն իմանում է, որ կկվին խորհուրդ է տվել ագռավը և որոշում է նրանից վրեժ լուծել ու բռնում է ագռավին: Սակայն ագռավը նրան խաբելով տանում է այնտեղ, որտեղ պառկած էր շունը. վերջինս բռնում է աղվեսին և խեղդում:
Տասներորդ հորիզոնականում էԽնկո-Ապոր «Ոսկե ձվիկը»։Տարածական յուրօրինակ, 3D ֆորմատով հետաքրքիր ու գրավիչ պատկերազարդումներով այս գրքում ներկայացված է Խնկո-Ապոր «Ոսկե ձվիկը» զվարճալի և ուսանելի հեքիաթը:
| Տեղ | Փոփ. | Գիրք | Հրատ. | Քանակ | |
| 1 | նոր |
«20 հեքիաթ արքայադուստրերի մասին» |
Դավինչի | 167 | |
| 2 | նոր | «Առակներ․ գունավորիր ջրով» | GSM | 81 | |
| 3 | +3 | «Բոքոնիկը» | Բուկինիստ | 79 | |
| 4 | * | «Շաղգամը» | Բուկինիստ | 74 | |
| 5 | +4 |
Հովհաննես Թումանյան «Փիսիկի գանգատը» |
Բուկինիստ | 71 | |
| 6 | * | «Գայլն ու յոթ ուլիկները» | Բուկինիստ | 70 | |
| 7 | 0 | «Ով է ապրում տնակում» | Բուկինիստ | 69 | |
| 8 | -7 | «Շունն ու կատուն» | Բուկինիստ | 65 | |
| 9 | * |
Հովհաննես Թումանյան «Չարի վերջը» |
Բուկինիստ | 65 | |
| 10 | նոր |
Խնկո-Ապեր «Ոսկե ձվիկը» |
Արևիկ | 48 |
«Երևանյան բեսթսելերը» ներկայացրեց Ռոզա Գրիգորյանը
Ցանկում ներառված չեն«Երևանյան բեսթսելեր» մրցանակի արժանացած գրքերը
Վարկանիշային ցուցակի կազմման հարցումներին մասնակցել են «Բուկինիստ» (011-53-74-13), «Հայ գիրք-Դարան» (56-80-38), «Զանգակ» (011-22-33-66), «Նոր գրախանութ» (044-53-74-74) գրախանութների և գրատների ցանցերը: