Մեկնարկել է «Պետական և ռազմական կառավարում» մասնագիտությամբ մագիստրոսական կրթական ծրագիրը
2 րոպեի ընթերցում
![Մեկնարկել է «Պետական և ռազմական կառավարում» մասնագիտությամբ մագիստրոսական կրթական ծրագիրը](http://armenpress.am/resized/480/static/news/b/2022/08/1091432.jpg)
ԵՐԵՎԱՆ, 31 ՕԳՈՍՏՈՍԻ, ԱՐՄԵՆՊՐԵՍ: ՀՀ պաշտպանության նախարարությանց պաշտպանական ազգային հետազոտական համալսարանում (ՊԱՀՀ) օգոստոսի 30-ին մեկնարկել է 2022-2023 թթ. ուսումնական տարվա «Պետական և ռազմական կառավարում» մասնագիտությամբ մագիստրոսական կրթական ծրագիրը։
Ինչպես «Արմենպրես»-ին տեղեկացրին ՀՀ պաշտպանության նախարարությունից, համալսարանի առաքելությանը և նպատակներին համապատասխան կրթություն իրականացնելու համար ՊԱՀՀ-ում մշակված մագիստրոսական ծրագրի նպատակն է պաշտպանական-անվտանգային հետազոտությունների արդյունքների կիրառմամբ ուսումնառողների ռազմավարական և քննադատական մտածողության զարգացումը: «Կրթական ծրագիրը միտված է ուսումնառողներին պետական, ռազմական ու ռազմավարական կառավարման, ռազմական ռազմավարության, միջազգային, տարածաշրջանային, ազգային, ինչպես նաև ռազմատնտեսական անվտանգության, ռազմավարական առաջնորդության, ռազմավարական պլանավորման վերաբերյալ համալիր գիտելիքների փոխանցմանը, ռազմագիտական ու վերլուծական կարողությունների զարգացմանը և մասնագիտական գործունեության ոլորտում կիրառման հմտությունների կատարելագործմանը»,- ասվում է հաղորդագրության մեջ:
ՊԱՀՀ պետ, գեներալ-մայոր Գենադի Տավարածյանը շնորհավորել է կրթական ծրագրի մասնակիցներին ուսումնական գործընթացի մեկնարկի առթիվ, մաղթել հաջողություններ ուսումնառության ընթացքում: