2 րոպեի ընթերցում
ԵՐԵՎԱՆ, 10 ՕԳՈՍՏՈՍԻ, ԱՐՄԵՆՊՐԵՍ: Հայաստանի մայրաքաղաքում օգոստոսի 12-25-ը կանցկացվի «Սիմֆոնիկ Երևան» միջազգային երաժշտական փառատոնը:
Ինչպես «Արմենպրես»-ին տեղեկացրին Երևանի քաղաքապետարանի աշխատակազմից, Հայաստանի պետական սիմֆոնիկ նվագախմբի և Մշակույթի աջակցման եվրոպական հիմնադրամի նախաձեռնությամբ անցկացվող երաժշտական նախագիծն իրականացվում է Երևանի քաղաքապետարանի աջակցությամբ:
«Առաջին անգամ կայանելու է շատ հետաքրքիր մշակութային միջոցառում, որը կկազմի երևանյան մշակութային կյանքի մի մասը: Վստահ եմ՝ այն մեծ հետաքրքրություն է առաջացնելու թե՛ Երևանի բնակիչների և թե՛ զբոսաշրջիկների շրջանում: Կարծում եմ փառատոնը կարող է դառնալ ամենամյա»,- նշում է Երևանի քաղաքապետի առաջին տեղակալ Լևոն Հովհաննիսյանը:
«Փառատոնը կազմված է 14 համերգից: Երկացանկում հայ և արտասահմանյան կոմպոզիտորների ստեղծագործություններն են՝ Մոցարտ, Շուբերտ, Շոպեն, Չայկովսկի, Խաչատրյան, Մանսուրյան:
«Սիմֆոնիկ Երևան»-ը Հայաստան կբերի միջազգային ճանաչում ունեցող երաժիշտների: Երեկոները կղեկավարեն դիրիժորներ Դանիել Ռայսկինը, Գերգելի Մադարաշը, Սերգեյ Սմբատյանը»,- ասվում է հաղորդագրության մեջ։
Ըստ աղբյուրի՝ փառատոնի նպատակն է ոչ միայն մատուցել որակյալ երաժշտություն, այլև կրթամշակութային առաքելությամբ նպաստել դասականի տարածմանը:
«Համայնքային կրթամշակութային կենտրոնների ու երաժշտական դպրոցների սաները ևս մասնակից կլինեն այս փառատոնին: Մենք հնարավորություն կստեղծենք մեր երեխաների համար շփվել փառատոնի համար Երևան այցելած ճանաչված երաժիշտների հետ, որոնք նաև վարպետության դասեր կանցկացնեն, ինչը, վստահ եմ, լրացուցիչ խթան կլինի»,-ընդգծում է Լևոն Հովհաննիսյանը:
Նշվում է, որ «Սիմֆոնիկ Երևան» փառատոնը հնարավորություն է նաև զարգացնել Երևանի զբոսաշրջությունը նոր՝ երաժշտական ուղղությամբ: