Քանդակագործությունը՝ հիմնական շեշտադրում. Երևանի սրտում բացվեց «Ֆորմ ընդ սիզոնս» նոր պատկերասրահը

ԵՐԵՎԱՆ, 23 ՀՈՒԼԻՍԻ, ԱՐՄԵՆՊՐԵՍ: Երևանի սրտում՝ Հանրապետության հրապարակում, հուլիսի 21-ին պաշտոնապես բացվեց «Ֆորմ ընդ սիզոնս» նոր պատկերասրահը: «Արմենպրես»-ի հետ զրույցում պատկերասրահի հիմնադիրները նշեցին՝ իրենց նպատակն է բացահայտել նոր տաղանդաշատ ստեղծագործողների և արվեստի միջոցով ավելի ճանաչելի դարձնելնրանց ուրույն խոսքն ու մոտեցումը մշակութային աշխարհում:

Պատկերասրահի համահիմնադիր Լուսինե Սիմոնյանն ընդգծեց՝ պատկերասրահում շեշտը դրել են քանդակագործության վրա, ներկայացված են ինչպես ավագ սերնդի, այնպես էլ՝ երիտասարդների աշխատանքները:Ցուցադրվում է ավելի քան 25 հեղինակների ստեղծագործություն:

«Մեր ամենօրյա աշխատանքի ընթացքում նկատել ենք, որ հանրությունը, թերևս, առավել նախընտրում է գեղանկարչությունը: Եվ հիմա մեր առջև խնդիր ենք դրել՝ հանրությանը կամաց-կամաց սովորեցնել գնահատել, ընդունել քանդակագործությունը»,- նշեց Լուսինե Սիմոնյանը:

Նկարիչների միության նախագահ Սուրեն Սաֆարյանը ողջունեց այն հանգամանքը, որ արվեստի ցուցասրահներ են բացվում: Վերջինս նշեց, որ մեր երկրում պատկերասրահների պակաս կա, ու դրանց ավելացումը զարգացման է տանելու:

«Ես ուրախ եմ, որ այսօր մենք ականատես ենք ևս մեկ մշակութային հաստատության ստեղծմանը: Լիահույս եմ, որ այն երկար տարիների կյանք կունենա, կկարողանա ընդլայնել իր աշխարհագրությունը և խթան կհանդիսանա հայ կերպարվեստի զարգացման համար»,- ասաց նա:

Պատկերասրահի համադրման աշխատանքները կատարել է համահիմնադիր Արմեն Թուրաջյանը: Նա ընդգծեց՝ իրենց գործունեությունը սկսել են դեռևս մի քանի տարի առաջ՝ Հայաստանից դուրս տարբեր ցուցահանդեսներ կազմակերպելու ճանապարհով: Համագործակցել են Ռուսաստանում Հայաստանի դեսպանությանը կից մշակույթի կենտրոնի հետ, այնտեղ ունեցել են մի քանի ցուցահանդեսներ, որից հետո համահինադիրը որոշել է ձեռնարկել այս նախագիծը:

«Ընդհանրապես, սիրել եմ արվեստը ու իմ հավաքածուում ունեցել եմ բավական հետաքրքիր աշխատանքներ: Ցանկություն կար՝ հետագայում առավել լուրջ զբաղվել»,- պատմեց Արմեն Թուրաջյանը:

Հիմնադիրներն այլ երկրների ստեղծագործողների աշխատանքները Հայաստանում ներկայացնելու և շատ այլ նախագծեր կյանքի կոչելու նպատակով գործակցել են համահիմնադիրներից կոլեկցիոներ Դավիթ Ալեքսանդրովիչի հետ:

«Ցանկություն կար այն գաղափարները, որոնք արդեն իրագործվել էին շատ քաղաքներում և շատ միջազգային ցուցահանդեսներում, ներկայացնել նաև Երևանում: Մեր նպատակն է ներկայացնել ոչ միայն տեղացի հայտնի նկարիչներին, այլև՝ բացահայտել աշխատել ցանկացող տաղանդավոր երիտասարդների պոտենցիալը»,- նշեց Ալեքսանդրովիչը:

Հիմնադիրները վստահեցրին՝ այցելուները պատկերասրահում ժամանակ առ ժամանակ նոր ստեղծագործություններ կգտնեն: Վստահ են՝ կկարողանան հասարակության շրջանում բարձրացնել քանդակագործության հանդեպ ուշադրությունը, կստիպեն հասարակությանը ուշադրության կենտրոնում պահել նաև հայ քանդակագործների աշխատանքները:

Կարինե Տերտերյան