Սա միգրացիոն ոլորտի ամենամասշտաբային փոփոխությունն է. ՄԾ պետը մանրամասնել է ՆԳՆ ստեղծման նախագիծը
6 րոպեի ընթերցում
ԵՐԵՎԱՆ, 13 ՀՈՒԼԻՍԻ, ԱՐՄԵՆՊՐԵՍ: Ներքին գործերի նախարարություն ստեղծելու փաթեթի մշակման աշխատանքները մոտենում են իրենց ավարտին, որի համաձայն` նախարարության կազմում են լինելու Ոստիկանությունը, Փրկարար ծառայությունն ու Միգրացիոն ծառայությունը: «Արմենպրես»-ի հետ զրույցում Միգրացիոն ծառայության պետ Արմեն Ղազարյանը վերակազմակերպումը արդյունավետ համարեց:
«Ներքին գործերի նախարարության փաթեթի նախագծման ամենասկզբից ևեթ Միգրացիոն ծառայությունը ներգրավված է եղել աշխատանքներում: Հիմնական խնդիրները, որ մենք առաջ էինք քաշել՝ քաղաքականության մշակման և իրականացման, տարանջատման հետ կապված հարցերը, գործառույթային շղթայի ամբողջականացման, տարբեր գերատեսչություններում միգրացիոն գործառույթների բաշխվածության, վերանայման հետ կապված խնդիրները հիմնականում իրենց արձագանքն ու անդրադարձը գտել են փաթեթում»,-ասաց նա, հավելելով, որ փաթեթը ներկայումս լրամշակման փուլում է, առաջիկայում կներկայացվի ինչպես հանրային քննարկմանը, այնպես էլ խորհրդարանի հաստատմանը:
Արմեն Ղազարյանը նշեց, որ Հայաստանում ոչ ստանդարտ իրավիճակ է` կապված միգրացիայի կառավարման հետ և միգրացիոն քաղաքականության մշակույթը, որպես գործառույթ, օրենսդրական մակարդակում ներկայումս վերապահված չէ որևէ նախարարության:
«Միգրացիոն ոլորտի քաղաքականության ռազմավարական փաստաթղթերը ներկայումս մշակվում են Միգրացիոն ծառայության կողմից, ինչն իրականում ճիշտ չէ, քանի որ Միգրացիոն ծառայությունը նախարարությանը ենթակա մարմին է, որը պետք է իրականացնի մշակած քաղաքականությունը և մասնակցի քաղաքականության մշակմանը, այլ ոչ մշակի քաղաքականությունը: Ներքին գործերի նախարարության ստեղծմամբ այս խնդիրը լուծվում է: Միգրացիոն քաղաքականության մշակումը վերապահվում է ՆԳՆ-ին, իսկ իրականացումը` Միգրացիոն ծառայությանը ծառայությանը»,-նշեց նա:
Անդրադառնալով գործառույթին՝ Միգրացիոն ծառայության պետն ասաց, որ միգրացիայի ոլորտին առնչվող գործառույթները սփռված են ամբողջ պետական համակարգով, իսկ ապակենտրոնացված կառավարումն այս ոլորտում արդյունավետ չէ:
«Մի շարք գործառույթներ ոլորտի կառավարման մասով իրականացվում են Միգրացիոն ծառայության կողմից, որոշներն՝ Աշխատանքի և սոցիալական հարցերի նախարարության, մյուսները` Ոստիկանության կողմից, և շատ հաճախ խնդիրներ են առաջանում փոխգործակցության առումով, ծառայության մատուցման ժամանակի ձգձգման առումով, տվյալների բազաների համադրելիության առումով: Այս խնդիրները լուծվում են կառուցվածքային փոփոխության արդյունքում, որը ֆունկցիոնալ վերլուծության վրա հիմնված ռեֆորմ է»,-նշեց նա:
Ղազարյանը շեշտեց՝ այն ծառայությունները, որոնք առնչվում են սոցիալական պաշտպանությանը և սոցիալական աջակցությանն, ավանդաբար իրականացրել է Միգրացիայի ծառայությունը և դրանք ավանդույթի ուժով պահպանվել են ծառայությունում:
«Օրինակ, մենք հիմա իրականացնում ենք Ադրբեջանից բռնագաղթած և ժամանակավոր կացարաններում բնակվող անձանց բնակարանային ապահովության հարցը, բայց դրանք միգրացիոն խնդիրներ չեն և այն կարողությունը, որն անհրաժեշտ է նման ծառայություն մատուցելու համար, Միգրացիոն ծառայությունում առկա չէ: Մենք մեր եղած ռեսուրսներով հաջողությամբ իրականացնում ենք, բաց սա պետք է փոխանցվի Աշխատանքի և սոցիալական հարցերի նախարարությանը: Օտարերկրացիների, փախստականների, վերադարձող քաղաքացիների ինտեգրման գործառույթն ինքնին սոցիալական գործառույթ է, որովհետև դրա բաղկացուցիչ մասը սոցիալական աջակցությունն է, կարիքի գնահատումն է, որոնք պետք է իրականացնի սոցիալական ծառայությունը»,-ընդգծեց Ղազարյանը:
Անդրադառնալով մարտահրավերներին՝ Միգրացիոն ծառայության պետն ասաց, որ մարտահրավերները բազում են, քանի որ սա միգրացիոն ոլորտի ամենամասշտաբային կառուցվածքային փոփոխությունն է անկախության տարիներին, և չեն կարող նման փոփոխությունները չուղեկցվել մարտահրավերներով:
«Առաջինը դա նոր իրավիճակին ադապտացիան է, քանի որ մենք բոլորովին նոր խնդիրներ ենք դնում ծառայությունների առաջ: Դա առաջին հերթին ծառայության որակի բարձրացումն է: Երկրորդ մեծ մարտահրավերն այն է, որ մենք նախապատրաստում և իրականացնելու ենք մասշտաբային թվայնացման գործընթացներ, որն ուղեկցվում է ինչպես աշխատակազմի վերապատրաստման անհրաժեշտությամբ, այնպես էլ քաղաքացիների շրջանում իրազեկվածության բարձրացմամբ: Շատ հաճախ մենք տեսնում ենք դեպքեր, երբ պետությունը որոշակի ծառայություններ թվայնացնում է, բայց քաղաքացիները տեղյակ չեն, երբեմն էլ՝ չունեն այն կարողությունները, որպեսզի օգտվեն այդ ծառայությունից»,- հավելեց Ղազարյանը:
Նա նշեց, որ աշխատանքի հիմքով կացության կարգավիճակի տրամադրումն արդեն իսկ թվայնացվել է, առաջիկայում էլ հանրությանը և Հայաստան եկող օտարերկրացիներին կիրազեկեն փոփոխությունների մասով:
Հեղինակ` Անի Դանիելյան
Լուսանկարները` Մխիթար Խաչատրյանի