Կողբի երաժշտական դպրոցն անվանակոչվել է կոմպոզիտոր Տիգրան Մանսուրյանի պատվին

ԵՐԵՎԱՆ, 4 ՄԱՅԻՍԻ, ԱՐՄԵՆՊՐԵՍ: «Կողբ» հիմնադրամի նախաձեռնությամբ և Նոյեմբերյան համայնքի ավագանու որոշմամբ՝ Կողբի երաժշտական դպրոցն անվանակոչվել է մեծանուն կոմպոզիտոր Տիգրան Մանսուրյանի պատվին։

«Արմենպրես»-ի հաղորդմամբ՝ մաեստրոն նույնպես ներկա է եղել միջոցառմանը՝ այն դարձնելով առավել ջերմ ու հիշարժան։

Անվանական ցուցանակի բացմանը հաջորդել է դպրոցի տնօրեն Տիգրան Հարությունյանի ողջույնի խոսքը, որից հետո դպրոցի աշակերտները ներկայացրել են մաեստրո Մանսուրյանի հարուստ կենսագրությունն ու անցած ճանապարհը։

Այնուհետեւ ողջույնի խոսքով հանդես են եկել համայնքապետ Արսեն Աղաբաբյանն ու «Կողբ» հիմնադրամի հոգաբարձուների խորհրդի նախագահ Արման Բարսեղյանը, որին հաջորդել է մաեստրոյի ջերմ ու հուզիչ խոսքը։

Միջոցառումը շարունակվել է դպրոցի աշակերտների և ուսուցիչների համերգով՝ լի մանսուրյանական ոգով։

«Վերանորոգված, կահավորված, նոր երաժշտական գործիքներով համալրված և արդեն Տիգրան Մանսուրյանի անունը կրող դպրոցի ուսուցիչներն ու սաները ավելի մեծ պատասխանատվությամբ կշարունակեն իրենց աշխատանքն ու կրթությունը»,- իր խոսքում նշել է «Կողբ» հիմնադրամի տնօրեն Մարիա Պետրոսյանը:

Միջոցառման ավարտին «Կողբ» հիմնադրամը մի շարք դրամաշնորհներ և կրթաթոշակներ է հանձնել Կողբի հանրակրթական և երաժշտական դպրոցների ուսուցիչներին և աշակերտներին 2022 թվականի 1-ին եռամսյակում արձանագրած հաջողությունների և ձեռքբերումների համար։

Անվանակոչության արարողությունը եզրափակվել է «Կողբ» հիմնադրամի կողմից Տիգրան Մանսուրյանի անվան ամենամյա երաժշտական մրցանակի սահմանման մասին հայտարարությամբ։

Մրցույթի պայմանները շուտով կհրապարակվեն հիմնադրամի կողմից։

«Կողբ» հիմնադրամը ստեղծվել է 2013 թվականին: Հիմնադրամի առաքելությունը կրթամշակութային նախագծերի իրականացման միջոցով Հայաստանի մարզերում կյանքի որակի բարելավումն է, իսկ տեսլականը՝ այնպիսի Հայաստանը, որտեղ բարեգործական հիմնադրամներն անելիք չունեն: