3 րոպեի ընթերցում
ԳԱՎԱՌ, 27 ԱՊՐԻԼԻ, ԱՐՄԵՆՊՐԵՍ։ Սեւան համայնքի Ծաղկունք գյուղում կայացել է «Գագարին» ներդրումային ծրագրի միջգերատեսչական աշխատանքային խմբի առաջին նիստը, որը վարել է ՀՀ էկոնոմիկայի նախարար, աշխատանքային խմբի ղեկավար Վահան Քերոբյանը։
Ինչպես «Արմենպրես»-ին տեղեկացրին Սեւանի համայնքապետարանի աշխատակազմից, աշխատանքային խմբի անդամներին, որոնք ներկայացված էին տարբեր գերատեսչությունների, տարածքային կառավարման եւ տեղական ինքնակառավարման մարմինների, «ԴԱՐ» տարածաշրջանային զարգացման եւ մրցունակության հիմնադրամի կողմից, ինչպես նաեւ հրավիրյալներին է ներկայացվել «Գագարին» ներդրումային ծրագիրն՝ ըստ բաղադրիչների եւ ուղղությունների։
«Ներդրումները կատարվելու են կրթության, մշակույթի, սպորտի, արվեստների եւ արհեստների զարգացման, համապատասխան հաստատությունների հիմնման, նյութական եւ ոչ նյութական մշակութային ժառանգության պահպանման, անտառապատման, Հրազդան գետի վերակենդանացման եւ ռեկրեացիոն գոտու ձեւավորման, թափոնների կառավարման եւ խորը վերամշակման, ագրոքոլեջի եւ ինովացիոն կենտրոնի հիմնման, սննդամթերքի անվտանգության եւ որակի հավաստման լաբորատորիաների ստեղծման, անասնապահության եւ բուսաբուծության զարգացման, դրանց վրա հիմնված խորը վերամշակման համակարգերի հիմնան, առողջության առաջնային պահպանության կենտրոնի, լաբորատորիաների, տարեցների խնամքի կենտրոնի, մանկական վերականգնողական կենտրոնի, ստացիոնար հիվանդանոցի եւ առողջարանի, դետոքս կենտրոնի, էսթետիկ բժշկության կլինիկայի, ակնաբուժական կլինիկայի, հոմեոպատիայի կենտրոնի հիմնան, էներգետիկ եւ գծային ենթակառուցվածքների, ճանապարհների կառուցման և վերանորոգման, բնակելի եւ հասարակական նշանակության շենքերի, շինությունների կառուցապատման, գյուղատնտեսական շուկայի, հանրային սննդի հանգույցի, առեւտրային համալիրի կառուցման եւ այլ ուղղություններում։
Աշխատանքային խմբի հաջորդ նիստը տեղի կունենա մայիս ամսին Սևան քաղաքում»,-ներկայացրին Սեւանի համայքնապետարանի աշխատակազմից։
«ԴԱՐ» տարածաշրջանային զարգացման եւ մրցունակության հիմնադրամը նախաձեռնել է Հայաստանի Հանրապետության Գեղարքունիքի մարզի Սեւան համայնքի Գեղամավան, Դդմաշեն, զովաբեր, Ծաղկունք, Վարսեր, Գագարին բնակավայրերի համայնքային զարգացման ծրագիր մշակելու գործընթաց։
«Գագարին» նախագծի նպատակն է՝ ձեւավորել կայուն զարգացող եւ նորարար կենսակերպով ինքնաբավ համայնք՝ նպաստելով բնակիչների բարեկեցությանը, ստեղծագործականությանն ու ներդաշնակ կյանքին։
Խոսրով Խլղաթյան
