Գեղարքունիքի մարզպետարանում կայացավ Սևանի ջրավազանային կառավարման պլանի նախագծի չորրորդ հանրային քննարկումը
2 րոպեի ընթերցում
ԳԱՎԱՌ, 19 ԱՊՐԻԼԻ, ԱՐՄԵՆՊՐԵՍ։ Գեղարքունիքի մարզպետարանում տեղի ունեցավ Սեւանի ջրավազանային կառավարման պլանի նախագծի շրջակա միջավայրի վրա ազդեցության նախնական գնահատման հայտի վերաբերյալ հանրային չորրորդ եւ ավարտական քննարկումը:
Ինչպես «Արմենպրես»-ին տեղեկացրին Գեղարքունիքի մարզպետարանի գյուղատնտեսության եւ բնապահպանության վարչությունից, «Սեւանի ջրավազանային կառավարման պլանի» նախագիծը մշակվել է ԵՄ «Ջրային նախաձեռնություններ Պլյուս» ծրագրի շրջանակներում:
Հանրային քննարկումը կազմակերպվել էր ՀՀ շրջակա միջավայրի նախարարության «Շրջակա միջավայրի վրա ազդեցության փորձաքննական կենտրոն» ՊՈԱԿ-ի կողմից՝ Գեղարքունիքի մարզպետարանի հետ համագործակցությամբ, «Շրջակա միջավայրի վրա ազդեցության գնահատման եւ փորձաքննության մասին» ՀՀ օրենքի համաձայն, ինչպես նաեւ ՀՀ կառավարության համապատասխան որոշմամբ սահմանված կարգով:
Հանրային քննարկմանը մասնակցում էին շահագրգիռ կառույցների, շահառու եւ ազդակիր համայնքների, մարզպետարանի գյուղատնտեսության եւ բնապահպանության վարչության ներկայացուցիչներ, «Շրջակա միջավայրի վրա ազդեցության փորձաքննական կենտրոն» ՊՈԱԿ-ի փորձագետներ։
Հանդիպման ընթացքում ծավալվեց առարկայական քննարկում, որի ընթացքում փորձագետները պատասխանեցին ներկաների կողմից բարձրացված հարցերին եւ տվեցին անհրաժեշտ պարզաբանումներ։ «Մասնակիցների կողմից ներկայացված առաջարկությունները ներառվել են իրականացվող ծրագրում։ Այսպիսով, Գեղարքունիքի մարզպետարանում 4 փուլով կազմակերպված հանրային քննարկումների արդյունքում վերջնական տեսքի բերվեց «Սեւանի ջրավազանային կառավարման պլան» հիմնադրութային փաստաթղթը, որը ենթադրում է Սևանա լճի ջրի որակի, քանակի ապահովում, կենսաբազմազանության պահպանություն եւ վերարտադրություն, ջրահավաք ավազանի այլ հիմնախնդիրների կարգավորում»,-ներկայացրին «Շրջակա միջավայրի վրա ազդեցության փորձաքննական կենտրոն» ՊՈԱԿ-ի փորձագետները։
Խոսրով Խլղաթյան