Վահրամ Դումանյանը ներկայացրեց կրթության՝ մինչև 2030 թվականի զարգացման ռազմավարության 2 հիմնական նպատակները
1 րոպեի ընթերցում
ԵՐԵՎԱՆ, 21 ՓԵՏՐՎԱՐԻ, ԱՐՄԵՆՊՐԵՍ: Հայաստանի Հանրապետության կրթության՝ մինչև 2030 թվականի զարգացման պետական ծրագրի նախագծի ռազմավարության հիմքում ընկած է երկու նպատակ։
«Արմենպրես»-ի հաղորդմամբ՝ այս մասին փետրվարի 21-ին կայացած ասուլիսի ժամանակ նշեց ԿԳՄՍ նախարար Վահրամ Դումանյանը:
«Յուրաքանչյուր ոք ունի տաղանդ. առաջին խնդիրը դրա բացահայտումն է։ Յուրաքանչյուր ոք պետք է ունենա հնարավորություն ինքնադրսևորվելու»,- ընդգծեց Դումանյանը։
Վերջինս նշելով ռազմավարության հիմքում ընկած երկրորդ նպատակը՝ նշեց, որ կրթության բոլոր փուլերում այն պետք է լինի որակյալ, մրցունակ՝ հիմնված ազգային արժեքների վրա։ Նախարարը նշեց, որ այդ ամենը պետք է նպաստի Հայաստանի զարգացմանը, հզորացմանը և առաջընթացին։
«Ուզում եմ ընդգծել, որ ներկայացված ռազմավարությունը համահունչ է Հայաստանի Հանրապետության կառավարության ծրագրին, ինչպես նաև մինչև 2050 թվականը Հայաստանի վերափոխման ռազմավարությանը»,- ասաց Վահրամ Դումանյանը։