1 րոպեի ընթերցում
ԳՅՈՒՄՐԻ, 12 ՓԵՏՐՎԱՐԻ, ԱՐՄԵՆՊՐԵՍ: Հայ Առաքելական Սուրբ Եկեղեցին փետրվարի 12-ին տոնում է Ս. Սարգիս զորավարի, նրա որդի Մարտիրոսի և զորավարի 14 զինվորների հիշատակը։
Ինչպես տեղեկացնում է «Արմենպրես»-ը, ձևավորված ավանդույթի համաձայն այս անգամ ևս Արթիկի երիտասարդությունը մեկտեղվում է Տուֆաշենի Ս. Սարգիս եկեղեցում, որտեղ ձեռամբ Արթիկի Թեմի Առաջնորդական Տեղապահ Հոգեշնորհ Տ. Նարեկ վրդ. Ավագյանի և մասնակցությամբ ողջ հոգևոր դասի կատարվում է Երիտասարդների օրհնության կարգ։
Արարողության ավարտին Հայր Սուրբը հակիրճ ներկայացրեց Ս. Սարգիս զորավարի վարքը և նահատակությունը՝ հորդորելով երիտասարդներին հավատարիմ մնալ ազգին և եկեղեցուն, ամուր պահել ավանդույթներն ու սովորությունները: «Սբ Սարգիսը հզոր զորավար էր, ամեն ինչ ուներ, բայց իր անձը տվեց Աստծուն և սպառազինվեց հոգևոր զենքերով և նահատակվեց հանուն իր հավատքի, դարձավ բարեխոս բոլորիս համար»,-իր խոսքում նշեց Արթիկի Թեմի Առաջնորդական Տեղապահ Հոգեշնորհ Տ. Նարեկ վրդ. Ավագյանը:
Արարաողության վերջում ներկաներին բաժանվեցին խաչեր:
Արմենուհի Մխոյան