3 րոպեի ընթերցում
ԵՐԵՎԱՆ, 6 ՍԵՊՏԵՄԲԵՐԻ, ԱՐՄԵՆՊՐԵՍ: «Արմենպրես»լրատվական գործակալությունը ներկայացնում է իր հեղինակային «Նոր գիրք» նախագիծը: Այն ամեն երկուշաբթի ընթերցողի դատին է հանձնում հայաստանյան հրատարակչությունների լույս ընծայած գրքերը: Գործակալության էջերում ընթերցասերները հնարավորություն ունեն տեղեկատվություն ստանալ նոր գրքերի մասին, ծանոթանալ դասական գործերին և արդի գրականության զարգացման միտումներին: Այս շաբաթ«Արմենպրես»-ն առանձնացրել է 2021 թվականին հրատարակված և հանրության դատին հանձնված տարբեր հրատարակչությունների երեք ուշագրավ գրքեր՝ տարբեր խորագրերի ներքո:
Հայ հեղինակ
Արմեն Բարխուդարյան, «Frisson»
Արմեն Բարխուդարյանի «Frisson» բանաստեղծությունների ժողովածուում հեղինակն անդրադառնում է տարբեր թեմաների։ Այն պատկերում է գաղթականի հոգու տառապանքները, նրա անդարձ կարոտը և վերադարձի բաղձանքը։ Բանաստեղծությունները յուրատեսակ մտորումներ են սիրո ուժի, հիասթափության, ապրելու ու արարելու ձգտման և այլ հարցերի շուրջ։ Գիրքը լույս է ընծայել «Էդիթ Պրինտ»-ը:
Թարգմանական գրականություն
Ռոբերտ Մենասե, «Մայրաքաղաք»
Ավստրիացի գրող Ռոբերտ Մենասեի «Մայրաքաղաք» վեպում ծավալվող իրադաձությունների կենտրոնում Եվրամիության վեց պաշտոնատար անձինքն են, որոնք պատասխանատու են Եվրամիության տարեդարձը նշելու նախապատրաստական աշխատանքների համար: Տոնակատարությունները նախատեսված են Օսվենցիմում, որտեղ շատերն առաջարկում են տեղափոխել Եվրոպայի քաղաքական մայրաքաղաքը: Բացի բարձր հասարակության ներկայացուցիչներից՝ վեպում կա նաև մարդասպան, որը սպանել է ինչ-որ կարևոր մեկին… Թարգմանությունը գերմաներենից՝ Կարլեն Մատինյանի, խմբագիր՝ Արքմենիկ Նիկողոսյան: Գիրքը լույս է ընծայել «Անտարես»-ը:
Մանկապատանեկան գրականություն
Մայքլ Բոնդ, «Փադինգթոն անունով արջուկը»
Փադինգթոն արջուկը, օվկիանոսը հատելով, հեռավոր Պերուից հասնում է Անգլիա` Լոնդոն: Այստեղ նա հանդիպում է տեր և տիկին Բրաուններին և շուտով դառնում այս հրաշալի ընտանիքի լիիրավ անդամը: Մեծ քաղաքում Փադինգթոնին սպասում են անհամար նորույթներ, հետաքրքիր ու անհավանական արկածներ: Թարգմանությունը` Լուսինե Հայրապետյանի, նկարազարդումները` Փեգի Ֆորթնումի: Գիրքը լույս է ընծայել «Զանգակ»-ը:
«Նոր գիրք»-ը ներկայացրեց Ռոզա Գրիգորյանը