Մեսին հայտավորվել է ՊՍԺ-ի առաջիկա խաղին․ նա կարող է նորամուտը նշել ֆրանսիական ակումբի կազմում
1 րոպեի ընթերցում
![Մեսին հայտավորվել է ՊՍԺ-ի առաջիկա խաղին․ նա կարող է նորամուտը նշել ֆրանսիական ակումբի կազմում](http://armenpress.am/resized/480/static/news/b/2021/08/1061868.jpg)
ԵՐԵՎԱՆ, 29 ՕԳՈՍՏՈՍԻ, ԱՐՄԵՆՊՐԵՍ։ ՊՍԺ-ի արգենտինացի հարձակվող Լիոնել Մեսին կարող է նորամուտը նշել ֆրանսիական ակումբի կազմում օգոստոսի 29-ին կայանալիք Ֆրանսիայի առաջնության 4-րդ տուրի «Ռեյմս»-ՊՍԺ խաղում։ «Արմենպրես»-ի փոխանցմամբ՝ Մեսին ՊՍԺ տեղափոխվելուց հետո առաջին անգամ ընդգրկված է թիմի հայտացուցակում։
ՊՍԺ-ի հայտացուցակում է նաև բրազիլացի հարձակվող Նեյմարը, ով նոր մեկնարկած մրցաշրջանում որևէ հանդիպման չէր մասնակցել։
Ֆրանսիական ակումբի հայտացուցակում ընդգրկվել է նաև ֆրանսիացի հարձակվող Կիլիան Մբապեն, ում՝ «Ռեալ» տեղափոխության մասին խոսակցություններն ու լուրերը չեն դադարում։
«Ռեյմս»-ՊՍԺ հանդիպումը տեղի կունենա օգոստոսի 29-ին և կմեկնարկի Երևանի ժամանակով ժամը 22։45-ին։