Թուրքիայի իշխանական կոալիցիայի մաս կազմող ԱՇԿ նախագահ Դևլեթ Բահչելին անդրադարձել է Աֆղանստանի իրադարձություններին

ԵՐԵՎԱՆ, 16 ՕԳՈՍՏՈՍԻ, ԱՐՄԵՆՊՐԵՍ։ Թուրքիայում իշխող կոալիցիայի մաս կազմող Ազգայնական շարժում կուսակցության (ԱՇԿ) նախագահ Դևլեթ Բահչելին խոսել է Աֆղանստանում տեղի ունեցող իրադարձությունների վերաբերյալ։Այս մասին, ինչպես հաղորդում է «Արմենպրես»-ը, հայտնում է թուրքական «Հաբերլեր» լրատվականը։

Բահչելին Աֆղանստանում տեղի ունեցող իրադարձություններում մեղադրել է մեծ տերություններին, որոնք «ազատություն և ժողովրդավարություն բերելու պահանջով խաղացել են այդ երկրի սոցիալական հավասարակշռության և արժեքների հետ»։

Նա, անդրադառնալով Թուրքական զինված ուժերի ներկայության պահպանմանը Աֆղանստանում, նշել է, որ անհնար է թուրք զինվորները դուրս բերվեն այնտեղից։

«Մեր զինվորների Աֆղանստանը լքելն անհնարին բան է: Աֆղանստանից վերադառնալը նշանակում է վտանգել Անատոլիայի աշխարհագրությունը»,- ասել է Բահչելին:

Թուրքիայի արտգործնախարար Մևլութ Չավուշօղլուն հայտնել է, որ Աֆղանստանի մայրաքաղաք Քաբուլում Թուրքիայի դեսպանատունը շարունակում է աշխատել:

«Մեր դիվանագիտական առաքելությունների և բոլոր աշխատակիցների համար անհրաժեշտ միջոցառումները ի սկզբանե էինք ձեռնարկել: Քաբուլում մեր դեսպանատունը շարունակում է իր գործունեությունը»,- հայտնել է Չավուշօղլուն:

Թուրք նախարարը հավելել է նաև, որ նախապատրասվում են Աֆղանստանը լքել ցանկացող Թուրքիայի քաղաքացիների այնտեղից դուրսբերման աշխատանքները։