Էրդողանը մեկնում է վերջին օրերին ջրհեղեղի հետևանքով տուժած Կաստամոնու նահանգ

ԵՐԵՎԱՆ, 13 ՕԳՈՍՏՈՍԻ, ԱՐՄԵՆՊՐԵՍ։ Թուրքիայի նախագահ Ռեջեփ Թայիփ Էրդողանը օգոստոսի 13-ին մեկնելու է ջրհեղեղից մեծապես տուժած Կաստամոնու նահանգ։

Այս մասին, ինչպես հաղորդում է «Արմենպրես»-ը, հայտնում է CNN-ի թուրքական ծառայությունը։

Էրդողանը մասնավորապես լինելու է Սև ծովի առափնյա Կաստամոնու նահանգի Բոզքուրթ շրջանում, որտեղ մասնակցելու է Արտակարգ իրավիճակների եւ տարերային աղետների վարչության (AFAD) համակարգող նիստին։

Թուրքիայի սեւծովյան առափնյա նահանգներում հորդառատ անձրեւների հետեւանքով առաջացած հեղեղումներից զոհվածների թիվն ավելացել Է՝ հասնելով 27-ի:Ջրհեղեղի հետևանքով զոհված 27 անձանցից 25-ը Կաստամոնու նահանգից են, իսկ 2-ը Սինոպ նահանգից։Շարունակվում են Բարթինի նահանգից մեկ անհետ կորած անձին գտնելու որոնողական աշխատանքները։