2 րոպեի ընթերցում
ԵՐԵՎԱՆ, 25 ՄԱՅԻՍԻ, ԱՐՄԵՆՊՐԵՍ: Երևանի ավագանին որոշեց «Երևանի հ. 100 հիմնական դպրոց» ՊՈԱԿ-ն անվանակոչել Արցախի ազատամարտի մասնակից, գրող Դավիթ Սարապյանի անվամբ՝ «Երևանի Դավիթ Սարապյանի անվան հ. 100 հիմնական դպրոց» ՊՈԱԿ:
«Արմենպրես»-ի հաղորդմամբ՝ զեկուցող Կարեն Սարգսյանն ասաց, որ դպրոցը Սարապյանի անվամբ անվանակոչելու վերաբերյալ դպրոցին առաջարկություն է ներկայացվել գրող, հրապարակոս Էլվինա Մելքումյանի կողմից:
«Հարցը քննարկվել է դպրոցի կառավարման և խորհրդակցական մարմիններում և արժանացել հավանության: Դպրոցը Սարապյանի անվամբ անվանակոչելու գործընթացը սկսվել է դեռ մեկ տարի առաջ: Այցելություն էր եղել այն դպրոց, որտեղ ազատամարտիկը սովորել է, թիվ 20 դպրոց, սակայն այն արդեն իսկ անվանակոչված է եղել: Էլվինա Մելքումյանն էլ այցելել է նաև հ. 100 դպրոց և խոսել տնօրենի ու աշխատակիցների հետ ու ստացել դրական կարծիք»,- նշեց Սարգսյանը: Որոշումն ընունվեց «33 կողմ» ձայներով:
Դավիթ Սարապյանը ծնվել է 1966 թվականի փետրվարի 4-ին Երևանում՝ ճարտարապետի ընտանիքում։ Հայրը՝ Էդուարդ Սարապյանը, Երևանի գլխավոր ճարտարապետն է եղել, մայրը՝ Էմմա Սարապյանը` ականավոր գիտնական։ Ձերժինսկու անվան միջնակարգ դպրոցն ավարտելուց հետո Սարապյանն ընդունվել է Երևանի պոլիտեխնիկական ինստիտուտի կիբեռնետիկայի ֆակուլտետ։ 1984 թվականի մայիսին մեկնել է խորհրդային բանակ: Աշխատել է որպես ռեժիսոր, գրել պատմվածքներ, «300 վայրկյան» վիպակը:
1990 թվականին մեկնել է ռազմաճակատ՝ առաջանագիծ, կռվել հրամանատար Լեոնիդ Ազգալդյանի «Անկախության բանակի» շարքերում, ապա՝ «Տիգրան Մեծ» ջոկատի կազմում: Իր քաջության և վճռականության համար նա ահ ու սարսափ էր տարածել թշնամիների շրջանում, ադրբեջանցիները նրան անվանել են «Ահեղ Դև»։
Դավիթ Սարապյանը զոհվել է Շահումյանի շրջանի Թոդան գյուղի համար մղվող մարտում՝ 1991 թվականի դեկտեմբերի 10-ին, աճյունն ամփոփված է Եռաբլուրում: