368.52
ՀՀ փոխվարչապետը և Ղազախստանի դեսպանը քննարկել են երկկողմ և ԵԱՏՄ շրջանակներում համագործակցության զարգացումը
2 րոպեի ընթերցում
ԵՐԵՎԱՆ, 7 ԱՊՐԻԼԻ, ԱՐՄԵՆՊՐԵՍ: Փոխվարչապետ Մհեր Գրիգորյանն ընդունել է Հայաստանի Հանրապետությունում Ղազախստանի Հանրապետության նորանշանակ դեսպան Բոլատ Իմանբաևին:
Ինչպես «Արմենպրես»-ին տեղեկացրին ՀՀ փոխվարչապետ Մհեր Գրիգորյանի գրասենյակից, շնորհավորելով Բոլատ Իմանբաևին նշանակման կապակցությամբ՝ փոխվարչապետը մաղթել է հաջողություններ նրան այս պատասխանատու պաշտոնում՝ հույս հայտնելով, որ նորանշանակ դեսպանը կշարունակի նախորդ դեսպանի գործը և իր ներդրումը կունենա հայ-ղազախական հարաբերությունների զարգացման գործում:
Դեսպանը, շնորհակալություն հայտնելով ընդունելության համար, փոխվարչապետին է փոխանցել Ղազախստանի գործընկերների ջերմ ողջույնները: Հանդիպման ընթացքում Բոլատ Իմանբաևն ընդծգել է, որ երկու երկրների բարեկամությունը հիմնված է պատմական և մշակութային կապերի, ինչպես նաև մարդկանց միջև ձևավորված ջերմ շփումների վրա:
ՀՀ փոխվարչապետ Մհեր Գրիգորյանի գրասենյակից հայտնում են նաև, որ շփումների ակտիվացման համատեքստում փոխվարչապետը ներկայացրել է դեսպանին «Ճամփորդիր առանց Քովիդ-19-ի» ծրագրի կարևորությունը և ընդգծել ապագայում Ղազախստանի կողմից ծրագրին միանալու նպատակահարմարությունը:
Ըստ աղբյուրի՝ զրուցակիցները քննարկել են ինչպես երկկողմ ձևաչափով, այնպես էլ ԵԱՏՄ շրջանակներում համագործակցության զարգացման հնարավորությունները, անդրադարձել փոխադարձ հետաքրքրություն ներկայացնող մի շարք հարցերի, այդ թվում՝ առևտրատնտեսական հարաբերությունների խորացման հեռանկարին:
Երկուստեք բարձր են գնահատվել ստեղծված կառուցողական հարաբերությունները և այդ համատեքստում կարևորվել միջկառավարական հանձնաժողովի աշխատանքների ակտիվացումը:
Անդրադարձ է կատարվել նաև կրթական, գիտական, բարձր տեխնոլոգիաների ոլորտներում համագործակցության զարգացման հնարավորություններին:
Բաժանորդագրվեք մեր ալիքին Telegram-ում