Թուրքիայի ՍԴ-ն հրաժարվել է քննել քրդամետ կուսակցությունը փակելու հայցը

1 րոպեի ընթերցում

ԵՐԵՎԱՆ, 31 ՄԱՐՏԻ, ԱՐՄԵՆՊՐԵՍ: Թուրքիայի Սահմանադրական դատարանը հրաժարվել է քննել քրդամետ Ժողովուրդների դեմոկրատական կուսակցությունը փակելու հայցն ու այն ուղարկել է դատախազություն: Ինչպես հաղորդում է «Արմենպրես»-ը, այս մասին հայտնում է թուրքական «Անադոլու» գործակալությունը:

ՍԴ-ից հայտնել են, որ հայցը ճիշտ չի ձևակերպվել և վերանայման կարիք ունի:

Ակնկալվում է, որ Գլխավոր դատախազությունը հայցը վերանայելուց և անհրաժեշտ շտկումներն անելուց հետո այն կրկին կուղարկի Սահմանադրական դատարան:

Նշենք, որ քրդամետ կուսակցությունը փակելու հայցը դժգոհությունների ու բողոքի մեծ ալիք էր բարձրացրել ինչպես երկրի ներսում, այնպես էլ երկրից դուրս: Շատ միջազգային իրավապաշտպան կազմակերպություններ հայտարարել էին, որ այդպիսով երկրում ոտնահարվում է քաղաքական ազատությունն ու խախտվում է միլիոնավոր այն մարդկանց ընտրական իրավունքը, ովքեր խորհրդարանական ընտրություններում ձայն էին տվել Ժողովուրդների դեմոկրատական կուսակցությանը: Նրանք կոչ էին արել հրաժարվել դեպի ավտորիտարիզմ տանող այդ քայլից:

Բաժանորդագրվեք մեր ալիքին Telegram-ում