Հայկ Մարությանը դատապարտել է հայ եւ հրեա ժողովուրդների ցեղասպանությունների հուշարձանի պղծումը
1 րոպեի ընթերցում
ԵՐԵՎԱՆ, 12 ՓԵՏՐՎԱՐԻ, ԱՐՄԵՆՊՐԵՍ: Երևանի քաղաքապետ Հայկ Մարությանը դատապարտել է Երեւանի Օղակաձեւ զբոսայգում գտնվող հայ եւ հրեա ժողովուրդների ցեղասպանությունների հուշարձանի պղծումը եւ հույս հայտնում, որ իրավապահներն արագ և համարժեք կարձագանքեն: «Արմենպրես»-ի փոխանցմամբ՝ Երևանի քաղաքապետը հուշարձանի պղծումը դատապարտող հայտարարություն է հրապարակել «Ֆեյսբուք»-ի իր էջում:
«Այսօր առավոտյան տեղեկացանք, որ անհայտ չարագործները պղծել են Երեւանի Օղակաձեւ զբոսայգում գտնվող՝ հայ եւ հրեա ժողովուրդների եղեռնի զոհերի հուշարձանը:
Որեւէ հուշարձանի նկատմամբ նման ոտնձգությունը միանգամայն անընդունելի եւ դատապարտելի արարք է, որը պետք է բացառել մեր քաղաքից:
Երեւանում տարբեր ազգությունների ներկայացուցիչներ հարյուրամյակներ շարունակ ապրել են կողք կողքի՝ իրենց ազգային պատկանելության հետ միասին հպարտությամբ կրելով նաեւ երեւանցի լինելու պատվաբեր կոչումը, եւ որեւէ մոտիվ չի կարող խաթարել այդ համերաշխությունը:
Հուսով եմ, իրավապահ մարմինները արագ եւ համարժեք արձագանք կտան»,- գրել է Մարությանը:
Լուսանկարը՝ հեռուստամեկնաբան Արտյոմ Երկանյանի էջից