Էրդողանը ԱՄՆ պատժամիջոցները համարում է ակնհայտ հարձակում Թուրքիայի վրա

ԵՐԵՎԱՆ, 16 ԴԵԿՏԵՄԲԵՐԻ, ԱՐՄԵՆՊՐԵՍ։ Թուրքիայի նախագահ Ռեջեփ Թայիփ Էրդողանը դեկտեմբերի 16-ին Նիղդե-Անկարա ավտոմայրուղու 2-րդ հատվածի բացման արարողության ժամանակ կոշտ հայտարարություններ է հնչեցրել ԱՄՆ-ի հասցեին՝ կապված այդ երկրի կողմից Թուրքիայի դեմ հայտարարված պատժամիջոցների հետ։ Ինչպես տեղեկացնում է «Արմենպրես»-ը, այս մասին հայտնում է İHA լրատվական գործակալությունը։

Ըստ Էրդողանի՝ ԱՄՆ-ն միակողմանի պատժամիջոցներով փորձում է իր երկրին ճնշումների ենթարկել և շեղել իր ընտրած ուղուց։

«2017 թվականից ի վեր ոչ մի երկրի նկատմամբ չի կիրառվել CAATSA-ի (օրենք «պատժամիջոցների միջոցով Ամերիկայի հակառակորդներին հակազդելու» մասին) պատժամիջոցները։ Որպես ՆԱՏՕ-ի անդամ, այն առաջին անգամ կիրառվում է մեր երկրի նկատմամբ: Ի՞նչ դաշինք է սա, ի՞նչ միություն է սա: Այս որոշումը ակնհայտ հարձակում է մեր երկրի վրա», - ասել է Էրդողանը:

Դեկտեմբերի 14-ին ԱՄՆ-ն պատժամիջոցներ էր սահմանել Թուրքիայի Պաշտպանական արդյունաբերության նախագահ Իսմայիլ Դեմիրի և երեք այլ անձանց դեմ։ Ըստ ԱՄՆ պետքարտուղար Մայք Պոմպեոյի, այդ որոշումը կապված է Անկարայի կողմից ռուսական C-400 զենիթահրթիռային համալիրների գնման հետ: Նա կոչ էր արել Թուրքիային ԱՄՆ-ի հետ համագործակցմամբ «անհապաղ» լուծել C-400-ի հետ կապված խնդիրը։ ԱՄՆ-ն պնդում է, որ ռուսական C-400-ները թուլացնում են ՆԱՏՕ-ի ընդհանուր ՀՕՊ համակարգերի պաշտպանվածության մակարդակը և դրանք դարձնում խոցելի։

Սեդրակ Սարգսյան