ԵՐԵՎԱՆ, 8 ԴԵԿՏԵՄԲԵՐԻ, ԱՐՄԵՆՊՐԵՍ: Թուրքիայում անցկացված նախորդ նախագահական ընտրություններում նախագահ Ռեջեփ Թայիփ Էրդողանի գլխավոր հակառակորդ, Հանրապետական ժողովրդական կուսակցության (CHP) նախկին պատգամավոր Մուհարրեմ Ինջեն հայտարարել է նոր քաղաքական կուսակցություն հիմնադրելու մասին։
Ինչպես հաղորդում է «Արմենպրես»-ը՝ վկայակոչելով թուրքական Demokrat Haber լրատվական կայքը, քաղաքական գործիչը, ընդգծելով Թուրքիայում բոլոր կուսակցությունների միանման լինելու փաստը, ասել է, որ Թուրքիայում ժողովրդավարություն հաստատելու նպատակով շարունակելու է մարտահրավերներ նետել մյուս կուսակցություններին։
«Չեք կարող ձեր երկիր բերել մի բան, որը բացակայում է ձեր կուսակցությունում: Հանրապետական ժողովրդական կուսակցությունում ժողովրդավարություն չկա: Ոչ մի ոլորտում չկա: Եթե փոխնախագահը ինքն է նշանակում և ուղարկում քաղխորհրդի անդամներին, ապա ինչ ժողովրդավարության մասին է խոսքը: Ովքե՞ր եք դուք: Գրավել եք կուսակցությունը, փոխել եք կանոնադրությունը, թե ՝ դու ինձ ընտրիր, ես էլ քեզ կընտրեմ..․ Ես երբեք չեմ դադարելու խոսել»,- ասել է Մուհարրեմ Ինջեն:
Քաղաքական գործիչը հայտնել է, որ այժմ իր աջակիցները ուսումնասիրում են եվրոպական շատ կուսակցությունների կանոնադրությունները և նախատեսում են մինչև 2020թ․ ավարտը հիմնադրել կուսակցությունը:
2018թ․ հունիսի 24-ին Թուրքիայում անցկացված նախագահական և խորհրդարանական համատեղ ընտրություններում ՀԺԿ-ի կողմից նախագահի թեկնածու առաջադրված Մուհարրեմ Ինջեն ստացել էր ձայների 30.7%։ 2020թ․ օգոստոս-սեպտեմբեր ամիսներին Ինջեն բազմիցս հայտարարել է ՀԺԿ-ից դուրս գալու և նոր քաղաքական կուսակցություն ստեղծելու ցանկության մասին։ Օգոստոսի 5-ին Մուհարրեմ Ինջեն լքել է ՀԺԿ-ն, իսկ սեպտեմբերի 4-ին նրա կողմից սկսվել է Հայրենական շարժումը (Memleket Hareketi), որը հող է նախապատրաստել նոր կուսակցության հիմնադրման համար։
Էմմա Արդարյան