Լինել զգոն, միացնել երկփուլ վավերացում. մասնագետը՝ հակառակորդից անձնական տվյալները պաշտպանելու մասին
3 րոպեի ընթերցում
ԵՐԵՎԱՆ, 4 ՆՈՅԵՄԲԵՐԻ, ԱՐՄԵՆՊՐԵՍ: Լինել բծախնդիր, առավել պաշտպանել անձնական տվյալներն էլեկտրոնային հարթակում, հակառակորդի հարձակումներից պաշտպանվելու համար սոցիալական ցանցերում միացնել երկփուլանի վավերացում. սրանք պատերազմական օրերին Անձնական տվյալների պաշտպանության գործակալության կողմից ամենաշատ տրվող խորհուրդներն են:
«Արմենպրես»-ի մամուլի սրահում հրավիրված ասուլիսում ՀՀ արդարադատության նախարարության անձնական տվյալների պաշտպանության գործակալության պետ Գևորգ Հայրապետյանը նշեց, որ պատերազմական օրերին անձնական տվյալների պաշտպանության խնդիրն ավելի է սրվում, որովհետև ադրբեջանական հաքերների կողմից հարձակումների, կեղծարարության փորձերը շատ են:
«Պետք է ընկալել այն, որ մարդու անձնական տվյալները գողանալով միայն տվյալ անձին չեն վնասում, այլ դրանք կարող են ոչ իրավաչափ այլ գործողություններով վնաս հասցել հասարակությանը, ապատեղեկատվություն, խուճապ տարածել: Պատերազմի ընթացքում ադրբեջանցի հաքերների միջամտության փորձերը հենց այդ մասին են վկայում: Օրինակ, սոցիլական ցանցերում օգտահաշիվներին են փորձում տիրանալ և արդեն վստահելի էջից ինֆորմացիա հավաքել»,-ասաց Գևորգ Հայրապետյանը:
Կեղածարարության դեպքերից է նաև այն, որ վերջերս կրկօրինակվել էր Հայաստան համահայկական հիմնադրամի էջը՝ ուղղված մարդկանց ֆինանսները գողանալուն: Այս մեթոդով փորձ է արվում նաև մարդկանց օգտահաշիվները գողանալ: Օրինակ, երբ նամակ է գալիս արտաքինից «Ֆեյսբուք» սոցիալական ցանցին շատ նման, որտեղ գրված է, թե ինչ-որ պատրվակով պետք է տրամադրել գաղտնաբառն ու մուտքանունը: Եթե մարդիկ այդ խայծը կուլ տան ու հավաքեն գաղտնաբառը, ապա ստացվում է, որ անձնական տվյալների մի փաթեթ տրամադրում են հակառակորդին: Մեկ այլ օրինակ է նաև այն, որ մի շարք հարթակներում, որտեղ կարելի է գործ գտնել ինտերնետի միջոցով, Հայաստանի քաղաքացիներին պատվերներ են ուղարկվում: Որտեղ նույնպես անձնական տվյալների պաշտպանության ռիսկ կա:
«Տեղեկատվական հատվածում հարձակման ռիսկ միշտ կա, դա եղել է նաև մինչ պատերազմը: Եթե կհիշեք, կորոնավիրուսի տարածման թեժ փուլում ևս եղան հարձակումներ, հրապարակվեցին վիրուսից մահացածների անունները: Իհարկե, պատերազմական պայմաններում ռիսկն ավելի մեծ է, սակայն միևնույն է, ցանկացած պարագայում պետք է լինել զգույշ, ուշադիր և կիրառել անձնական տվյալների պաշտպանության համար անհրաժեշտ քայլերը»,- ասաց Գևորգ Հայրապետյանը:
Անհրաժեշտ է հնարավորինս ապահովել սոցիալական ցանցերի անվտանգությունը, ընտրել բարդ գաղտնաբառ, ոչ մի պարագայում գաղտանաբառը չտրամադրել այլոց, միացնել երկփուլանի վավերացումը և այլն: Սեփական վարքագծով պետք է պաշտպանել անձնական տվյալները: