Թուրքիայի կողմից կոնֆլիկտում ներգրավվելու փորձը արհամարհանք է Մինսկի խմբի ֆորմատի նկատմամբ.թուրքագետ
2 րոպեի ընթերցում
![Թուրքիայի կողմից կոնֆլիկտում ներգրավվելու փորձը արհամարհանք է Մինսկի խմբի ֆորմատի նկատմամբ.թուրքագետ](http://armenpress.am/resized/480/static/news/b/2020/10/1033155.jpg)
ԵՐԵՎԱՆ, 29 ՀՈԿՏԵՄԲԵՐԻ, ԱՐՄԵՆՊՐԵՍ: Ղարաբաղյան պատերազմն ավելի բյուրեղացրեց Թուրքիայի ապակառուցողական, ահաբեկչական մտածողության դրսևորումները և ի ցույց դրեց աշխարհին:
«Արմենպրես»-ի մամուլի սրահում հրավիրված ասուլիսում այս մասին նշեց թուրքագետ Ռուբեն Մելքոնյանը:
«Նախ ուզում եմ նշեl, որ տարբեր կոնֆլիկտներում Թուրքիայի ներգրավվելու ոճը, ըստ էության, նույնական է: Այսինքն՝ իրականացնել ռազմական ագրեսիա, ներխուժել կոնֆլիկտների լուծման տիրույթ, եթե ոչ դիվանագիտական ճանապարհով, ապա ռազմական, և դրանից հետո փորձել տեղ գրավել բանակցությունների սեղանի շուրջ: Մենք հիմա ականատես ենք լինում թուրքական այդ ոճի հերթական դրսևորմանը»,- ասաց թուրքագետը:
Դրա նախադեպերը կան: Սիրիական կոնֆլիկտում Թուրքիան ներգրավվեց ու ագրեսիա իրականացրեց այդ պետության դեմ: Լիբիական կոնֆլիկտում նույնպես ներգրավվում է իր ռազմական ներկայությամբ, ղարաբաղյան կոնֆլիկտում Թուրքիայի այդ քաղաքական ոճը նույնպես դրսևորվեց և Ադրբեջանի միջոցով, ուղղակի ագրեսիա իրականացնելով Հայաստանի նկատմամբ, այսօր փորձում է տեղ գրավել բանակցությունների սեղանի շուրջ:
«Բացի այն, որ փորձում է ներգրավվել կոնֆլիկտի մեջ, սա բացահայտ արհամարհանք է ԵԱՀԿ Մինսկի խմբի ֆորմատի նկատմամբ, սա բացահայտ մարտահրավեր է աշխարհում ձևավորված միջազգայնորեն ճանաչված հարթակների նկատմամբ: Եվ Թուրքիայի բացահայտ նկրտումներն են` մտնել տարատեսակ կոնֆլիկտների մեջ, որտեղ չունի մանդատ»,- ասաց Ռուբեն Մելքոնյանը:
Արցախի դեմ սեպտեմբերի 27-ից Ադրբեջանի` Թուրքիայի և վարձկան-ահաբեկիչների աջակցությամբ սանձազերծած ռազմական գործողությունների ընթացքում երեք անգամ` հոկտեմբերի 10-ին Ռուսաստանի, հոկտեմբերի 18-ին Ֆրանսիայի, հոկտեմբերի 26-ին ԱՄՆ-ի միջնորդությամբ հայտարարվել է հրադադարի մասին, սակայն Ադրբեջանը ուժի մեջ մտնելուց րոպեներ անց խախտել է դրանք, ձեռնարկել դիվերսիոն գրոհներ, հրետակոծել առաջնագիծն ու խաղաղ բնակավայրերը։