Բոլոր լավ և վատ դասերը սովորել ենք, ժամանակն է ավելի հզորացնել պետությունը. Արմեն Սարգսյան

ԵՐԵՎԱՆ, 21 ՍԵՊՏԵՄԲԵՐԻ, ԱՐՄԵՆՊՐԵՍ: ՀՀ նախագահ Արմեն Սարգսյանը կարծում է, որ անկախության 29 տարիներին Հայաստանը բոլոր լավ ու վատ դասերը սովորել է, ժամանակն է՝ նորից երազելու և ավելի հզորացնելու պետությունը: «Արմենպրես»-ի հաղորդմամբ՝ նախագահը նման տեսակետ հայտնեց Եռաբլուրում լրագրողների հետ զրույցում:

Նախագահը նկատեց, որ 30 տարի առաջ մեր ողջ ժողովուրդը երազանք ուներ՝ վերականգնել իր անկախ պետականությունը, և 29 տարի առաջ այդ երազանքը կատարվեց: «29 տարվա մեջ ունեցանք և մեծ հաղթանակներ, դժվարություններ, ինչ-որ տեղ պարտվեցինք, կարծում եմ՝ բոլոր լավ և վատ դասերը սովորել ենք: Ժամանակն է նորից երազել, որպեսզի ապագա 30 տարում կառուցենք իրական, ամուր, հզոր մեր պետությունը»,-ասաց նախագահն ու ի սրտե շնորհավորեց բոլորին:

Հայաստանի երրորդ Հանրապետությունը սեպտեմբերի 21-ին նշում է անկախության 29-րդ տարեդարձը: 29 տարի առաջ հայ ժողովուրդը հանրաքվեի միջոցով իր վճռական «այո»-ն ասաց Հայաստանի անկախությանը: Հայաստանի չափահաս բնակչության 95% մասնակցության պարագայում ընտրողների 99.5%-ը «Համաձա՞յն եք, որ Հայաստանի Հանրապետությունը լինի ժողովրդավարական անկախ պետություն` ԽՍՀՄ կազմից դուրս» հարցին դրական պատասխան տվեց: Երկու օր անց` սեպտեմբերի 23-ին, երկրի Գերագույն Խորհուրդը Հայաստանը հռչակեց անկախ, ինքնիշխան հանրապետություն:

Աննա Գրիգորյան