2 րոպեի ընթերցում
ԵՐԵՎԱՆ, 31 ՕԳՈՍՏՈՍԻ, ԱՐՄԵՆՊՐԵՍ: Երևանյան հեռանկարներ միջազգային երաժշտական փառատոնի և Հայաստանի ազգային ֆիլհարմոնիկ նվագախմբի նախաձեռնությամբ սեպտեմբերի 4-ին, ՀՀ Ազգային ժողովի այգում կկայանա Վերդիի «Տրավիատա» օպերայի համերգային կատարումը:
«Արմենպրես»-ի հաղորդմամբ՝ միջոցառումն իրականացվելու է և ՀՀ կրթության, գիտության, մշակույթի և սպրոտի նախարարության աջակցությամբ:
Կազմակերպիչները ցանկանում են մշակութային զորակցությունը հայտնել վերջերս պայթյունից տուժած Բեյրութին, որը հայտնի է նաև «Արևելքի Փարիզ» անվամբ:
Տոմսերի ողջ հասույթը տրամադրվելու է Բեյրութում աղետից տուժած մշակութային կենտրոնների վերկանգնմանը: Հավաքված գումարը կրկնապատկվելու է ՀԲԸՄ-ի կողմից: Վերդիի ամենահայտնի այս փարիզյան սիրո պատմության գլխավոր հերոսներն են՝ միջազգային ճանաչում ունեցող օպերային աստղեր Լիանա Ալեքսանյանը (Վիոլետա Վալերի), Լիպարիտ Ավետիսյանը (Ալֆրեդ Ժերմոն) և Իլյա Սիլչուկովը (Ժորժ Ժերմոն):
Այլ դերերում հանդես են գալու Նարինե Անանիկյանը (Ֆլորա), Հովհաննես Անդրեասյանը (Գաստոն), Աշոտ Ղանթարջյանը (Բարոն Դյուֆոլ), Պողոս Բիազբեկյանը (Մարկիզ դ’Օբինյի), Հովհաննես Ներսեսյանը (Բժիշկ Գրենվիլ), Լուսինե Օրդուխանյանը (Անինա):
Օպերայի «Փարիզյան հասարակությանը» ներկայացնելու է Հայաստանի պետական կամերային երգչախումբը (գեղարվեստական ղեկավար և գլխավոր դիրիժոր՝ Ռոբերտ Մլքեյան): Համերգը ղեկավարելու է ՀԱՖՆ գեղարվեստական ղեկավար և գլխավոր դիրիժոր, Արվեստի վաստակավոր գործիչ Էդուարդ Թոփչյանը:
Միջոցառման ժամանակ պահպանվելու են հակահամաճարակային բոլոր պայմանները: Տոմսերը վաճառվում են միայն առցանց: