ԵՐԵՎԱՆ, 16 ՀՈՒԼԻՍԻ, ԱՐՄԵՆՊՐԵՍ: ՀՀ ազգային ժողովի «Բարգավաճ Հայաստան» խմբակցության պատգամավոր Արման Աբովյանը վստահ է, որ Ադրբեջանը երբեք պատրաստ չի եղել, չէ և չի լինելու կառուցողական երկխոսության: «Արմենպրես»-ի հաղորդմամբ՝ պատգամավորը նման տեսակետ հայտնեց ԱԺ արտահերթ նիստում:
Նա հիշեցրեց, որ գիշերը ադրբեջանական կողմը կրկին փորձել է դիվերսիոն ներխուժում անել, կրկին գնդակոծությունների է ենթարկել հայկական գյուղերը: «Սա ցայտուն ցույց է տալիս, և բոլորս պետք է շատ հստակ ֆիքսենք, որ ադրբեջանական կողմը պատրաստ չի եղել, պատրաստ չէ և պատրաստ չի լինի կառուցողական երկխոսության»,-ասաց Աբովյանը:
Պատգամավորը նշեց, որ Ադրբեջանը, Թուրքիան այն դեստրուկտիվ էլեմենտներն են տարածաշրջանում, որոնց համար կայունությունը ձեռնտու չէ: Պատգամավորը կարևորեց, որ բացի միջազգային արձագանքից, որն այսօր հնչում է, հայկական կողմն իր համար ֆիքսի, որ Ադրբեջանը երբեք ոչ մի կառուցողական որոշման չի գնալու տարածաշրջանում:
Նա նաև հորդորեց քաղաքացիներին լինել ուշադիր, օգտվել միայն պաշտոնական տեղեկատվությունից:
Հուլիսի 16-ի լույս գիշերը ժամը 03:40-ի սահմաններում ՀՀ ԶՈՒ դիրքապահները նկատել են հակառակորդի շարժ։ Անցնելով շրջանաձև պաշտպանության, հայկական ստորաբաժանումները կանխել են հակառակորդի դիվերսիոն ներթափանցման փորձը։Թեժ մարտից հետո հակառակորդը, կորուստներ կրելով, հետ է շպրտվել։Այնուհետև ադրբեջանական ստորաբաժանումները ժամը 05:20-ին սկսել են հրետակոծել Այգեպար և Մովսես գյուղերը՝ կիրառելով ականանետ և Դ-30 հաուբից:
Աննա Գրիգորյան