«Կայուն դպրոցական սնունդ» ռազմավարական ծրագիրն առաջիկա 5 տարում կշարունակվի
3 րոպեի ընթերցում
![«Կայուն դպրոցական սնունդ» ռազմավարական ծրագիրն առաջիկա 5 տարում կշարունակվի](http://armenpress.am/resized/480/static/news/b/2020/06/1018394.jpg)
ԵՐԵՎԱՆ, 13 ՀՈՒՆԻՍԻ, ԱՐՄԵՆՊՐԵՍ: Հայաստանում կայուն դպրոցական սննդի ներդրմանն ուղղված համագործակցության շրջանակը կարգավորելու նպատակով ՀՀ կրթության, գիտության, մշակույթի, սպորտի նախարարության և ՄԱԿ-ի Պարենի համաշխարհային ծրագրի հայաստանյան գրասենյակի միջև 2020 թվականի հունիսի 12-ին ստորագրվել է մտադրությունների նամակ՝ «Կայուն դպրոցական սնունդ» ռազմավարական ծրագրի՝ հետագա հինգ տարվա իրականացման վերաբերյալ:
«Արմենպրես»-ի հաղորդմամբ՝ մտադրությունների մասին նամակը նախատեսում է գործընկերության համակարգող մարմնի ստեղծում, ինչպես նաև ճանապարհային քարտեզի մշակում՝ Հայաստանում կայուն դպրոցական սննդի ներդրմանն ուղղված համագործակցության շրջանակը և երկարաժամկետ հարաբերությունները կարգավորելու համար: Բացի այդ, կհաստատվի համատեղ տարեկան գործունեության պլան:
Ընդլայնված համագործակցությունը առաջիկա տարիների համար ներառում է նաև առողջ սննդի տեղական արտադրության կազմակերպում, բոլոր շահառու երեխաների համար տաք սննդի ապահովում, ոչ միայն ՊՀԿ շահառու չորս, այլ նաև արդեն Ազգային ծրագրին փոխանցված վեց մարզերում դպրոցական խոհանոցների վերանորոգման և սարքավորումներով հագեցման լրացուցիչ աշխատանքներ, ինչպես նաև կայուն դպրոցական սննդի կազմակերպման և մշտադիտարկման ինստիտուցիոնալ կարողությունների զարգացում:
ՄԱԿ-ի Պարենի համաշխարհային ծրագրի և ՀՀ կառավարության միջև ստորագրված համաձայնագրով 2010 թվականից Հայաստանում իրականացվում է «Կայուն դպրոցական սնունդ» ծրագիրը, որի նպատակն է ստեղծել դպրոցական կայուն սննդի համակարգ։ Ազգային ծրագրի շրջանակում սնունդ է տրամադրվում տարրական դասարաններ և նախապատրաստական խմբեր ունեցող հանրակրթական դպրոցներին ՀՀ բոլոր մարզերում: Գործընկերության արդյունքում Հայաստանի բոլոր մարզերի հանրակրթական դպրոցների տարրական դասարանների աշակերտները ապահովվել են առողջ սննդով՝ առողջության ամրապնդման և աղքատության հաղթահարման գլոբալ համատեքստում՝ ելնելով ՄԱԿ-ի Կայուն զարգացման նպատակներից 2-րդով՝ Հայաստանի Հանրապետության հանձնառությամբ։
ՀՀ կառավարության և Պարենի համաշխարհային ծրագրի հայաստանյան գրասենյակի միջև 2020 թվականի ապրիլի 30-ին կնքված համաձայնագրով ամրագրվում է առաջիկա տարիներին համագործակցության ընդլայնման լայն օրակարգ: