Փաշինյանը միակ խնդիրը համարում է կորոնավիրուսին չհավատացողների առկայությունը

ԵՐԵՎԱՆ, 12 ՀՈՒՆԻՍԻ, ԱՐՄԵՆՊՐԵՍ: ՀՀ վարչապետ Նիկոլ Փաշինյանը կորոնավիրուսին չհավատացողների առկայությունը համաճարակի պայմաններում համարում է միակ խնդիրը:

«Արմենպրես»-ի փոխանցմամբ՝ Փաշինյանն այս մասին ասաց հունիսի 12-ին Ազգային ժողովում Հայաստանի Հանրապետությունում հայտարարված արտակարգ դրությունը ևս 30 օրով երկարաձգելու հարցի քննարկման ընթացքում` պատասխանելով «Լուսավոր Հայաստան» խմբակցության անդամ Սրբուհի Գրիգորյանի հարցին:

«Մենք իրավիճակի լրջության և իրավիճակից պաշտպանվելու գործիքների մասին պետք է լայնորեն իրազեկենք հանրությանը և քաջալերենք մեր հայրենակիցներին, որպեսզի նրանք այդ պաշտպանության միջոցները ձեռնարկեն: Այսօր Հայաստանում դեռ կան մարդիկ, որ խոսում են այն մասին, թե այս վարակը սուտ է, սարքած է: Մեր միակ խնդիրն է դա: Մեր խնդիրը առողջապահական համակարգից դուրս է: Այն մեր տաղավարներում է, այգիներում ու տներում»,- ասաց Փաշինյանը:

Հայաստանում հունիսի 12-ին, ժամը 11:00-ի դրությամբ հաստատվել է կորոնավիրուսային հիվանդության ընդհանուր 15 281 դեպք, որոնցից 5 639-ն` առողջացած: Կորոնավիրուսային հիվանդությամբ այս պահին փաստացի բուժում է ստանում 9 298 պացիենտ: Ընդհանուր առմամբ, կատարվել է 77 686 թեստավորում: Ընդհանուր առմամբ, կորոնավիրուսային հիվանդությունից արձանագրվել է մահվան 258 դեպք: Արձանագրվել է մահվան 86 դեպք, երբ պացիենտների մոտ հաստատվել է կորոնավիրուսային վարակ, սակայն մահը վրա է հասել այլ հիվանդության պատճառով։

Կառավարությունը հունիսի 12-ին որոշում է կայացրել ՀՀ-ում մարտի 16-ին հայտարարված և մինչև հունիսի 13-ը երկարաձգված արտակարգ դրության ժամկետը հունիսի 13-ից՝ ժամը 17:00-ից երկարաձգել ևս 30 օրով՝ մինչև հուլիսի 13-ը՝ ժամը 17:00-ն ներառյալ:

Նորայր Շողիկյան