1 րոպեի ընթերցում
ԵՐԵՎԱՆ, 5 ՀՈՒՆԻՍԻ, ԱՐՄԵՆՊՐԵՍ: Ազգային անվտանգության ծառայությունը 2019 թ. իրեն հատկացված պետական բյուջեի միջոցներից 400 մլն դրամի խնայողություն է կատարել: «Արմենպրես»-ի փոխանցմամբ՝ այս մասին Ազգային ժողովի մշտական հանձնաժողովների համատեղ նիստում «Հայաստանի Հանրապետության 2019թ. պետական բյուջեի կատարման մասին» տարեկան հաշվետվության նախնական քննարկման ընթացքում ասաց Ֆինանսների նախարար Ատոմ Ջանջուղազյանը:
«Ազգային անվտանգության ծառայության բյուջեն 2019 թ. համար սկզբնական ծրագրով շուրջ 32,8 մլրդ դրամ էր: Այն տարվա ընթացքում ճշտվել է՝ կազմելով 34,1 մլրդ դրամ: Փաստացի 33,7 մլրդ դրամի օգտագործում է եղել կամ ճշտված ծրագրի 98,7%-ը»,- ասաց նախարարը:
Ջանջուղազյանը հավելեց, որ ազգային անվտանգության միջոցառմանը հատկացվել է 30 մլրդ դրամ, որի կատարողականը կազմել է գրեթե 99%:
Հունիսի 5-ին ՀՀ Ազգային ժողովի մշտական հանձնաժողովների նիստերում մեկնարկել են «Հայաստանի Հանրապետության 2019թ. պետական բյուջեի կատարման մասին» տարեկան հաշվետվության նախնական քննարկումները:
Նորայր Շողիկյան