Ինձ զայրացնում է «թեստամոլուցքը»․ Թորոսյանը` քաղաքացիներին թեստավորելուց հրաժարվելու լուրերի մասին

ԵՐԵՎԱՆ, 21 ՄԱՅԻՍԻ, ԱՐՄԵՆՊՐԵՍ։ Հայաստանում քաղաքացիների մոտ կորոնավիրուսի հայտնաբերման համար կատարվող թեստավորումներն արվում են ըստ ցուցումների։

«Արմենպրես»-ի հաղորդմամբ՝ այս մասին մամուլի ասուլիսի ժամանակ ասաց ՀՀ առողջապահության նախարար Արսեն Թորոսյանը՝ անդրադառնալով քաղաքացիներին թեստավորելուց հրաժարվելու մասին լուրերին։

«Հակահամաճարակային միջոցառումների շրջանակում որոշում է կայացվում որևէ մեկին թեստավորել, որևէ մեկին ոչ, քանի որ դրա կարիքը չի լինում։ Չի կարելի թեստավորումներով պայմանավորել հակահամաճարակային միջոցառումները։ Մեր նախարարությունում էլ, հարևան նախարարություններում նույնպես ունենք կոնտակտավորների շրջանակ, կան նաև ինքնամեկուսացվածներ։ Թեստավորումը պետք է արվի ըստ ցուցումի։ Ինձ արդեն զայրացնում է այդ «թեստամոլուցքը»,- նշեց Թորոսյանը։

Նա ընդգծեց, որ թեստն ընդամենը բժշկական ցուցումներով արվող ևս մեկ միջոցառում է հիվանդին բացահայտելու համար, դրանով ոչինչ չի սահմանափակվում: Նախարարը շեշտեց, որ իրենք նույնիսկ թեստավորված քաղաքացուն ասում են, որ պետք է զգույշ լինի, քանի որ վաղը կարող է պատասխանը դրական լինել կամ վարակվել։

Կառավարությունը մայիսի 14-ին որոշում է կայացրել ՀՀ-ում 2020 թվականի մարտի 16-ին հայտարարված և մինչև մայիսի 14-ը երկարաձգված արտակարգ դրության ժամկետը 2020 թվականի մայիսի 14-ի ժամը 17:00-ից երկարացնել ևս 30 օրով՝ մինչև 2020 թվականի հունիսի 13-ի ժամը 17:00-ն ժամկետով:

Լիլիթ Դեմուրյան