Իսպանիայում սենատորներ և օտարերկրացիներ են հարգել Հայոց ցեղասպանության զոհերի հիշատակը

ԵՐԵՎԱՆ, 25 ԱՊՐԻԼԻ, ԱՐՄԵՆՊՐԵՍ։ Իսպանիայում Հայոց ցեղասպանության 105-րդ տարելիցին նվիրված առցանց միջոցառումներին միացել են սենատորներ, ներկա և նախկին քաղաքական գործիչներ և օտարերկրացիներ։ «Արմենպրես»-ի հետ զրույցում այս մասին ասաց Իսպանիայի Բարսելոն քաղաքի «Հայկական մշակութային միության» ատենապետ Տաթև Սուլյանը։

«Նախատեսված միջոցառումներին մասնակցել են հայեր և Իսպանիայում բնակվող այլ քաղաքացիներ։ 105-րդ ամյակի համար պատրաստված պաստառով նկարվողների թիվը գերազանցել է 450-ը, իսկ հեշթեգը տարածողների թիվը եղել է ավելի։ Առցանց միջոցառումներին ու արշավին միացել են սենատորներ, քաղաքական նախկին և ներկա գործիչներ։ Մեր հայրենակից Արա Մալիքյանը հայերենով և իսպաներենով ուղերձ է հղել և առցանց երաժշտական ելույթով հանդես եկել»,- ասաց Սուլյանը։

Տաթև Սուլյանը նշեց, որ միջոցառումներին միացել են նաև պաշտոնյաներ տարբեր երկրներից։

«Միլանից միացել էր պատգամավոր Ջուլիո Չենտեմերոն, իսկ Հայաստանից` ԱԺ Հայաստան-Իսպանիա բարեկամական խմբի ղեկավար Սոս Ավետիսյանը։ «Թվիթեր»-ով իրենց զորակցությունն են հայտնել Կատալունիայի ինքնավար մարզի նախկին ղեկավար Կարլես Պուչդեմոնը, ինչպես նաև տարբեր գործիչներ, մտավորականներ, դասախոսներ և ակտիվիստներ։ Հատուկ ուղերձով հանդես եկավ ՀՀ դեսպան Վլադիմիր Կարմիրշալյանը»,- նշեց Տաթև Սուլյանը։

Ապրիլի 24-ի երեկոյան` ժամը 21:00-ին տարբեր եկեղեցիների զանգերն են ղողանջել, Իսպանիայի տարբեր բնակավայրերում ու քաղաքներում տեղի է ունեցել մոմովառություն։ Հնչել է նաև հատուկ եկեղեցական աղոթք։

Օսմանյան կայսրության կողմից 1915թ. հայերի նկատմամբ իրականացված ցեղասպանությունը 20-րդ դարասկզբի մեծագույն ոճրագործությունն էր: Աշխարհասփյուռ հայությունը նշում է Հայոց ցեղասպանության 105-րդ տարելիցը: Ցեղասպանությունը ճանաչել և դատապարտել է մոտ երեք տասնյակ պետություն։

Նորայր Շողիկյան