Մերձավան գյուղում չբնակեցված տնակ է այրվել

ԵՐԵՎԱՆ, 19 ԱՊՐԻԼԻ, ԱՐՄԵՆՊՐԵՍ: ՀՀ արտակարգ իրավիճակների նախարարության Փրկարար ծառայության ճգնաժամային կառավարման ազգային կենտրոնն ապրիլի 18-ին, ժամը 18:46-ին տեղեկություն է ստացել, որ Արմավիրի մարզի Մերձավան գյուղում այրվում է չբնակեցված տնակ:

Դեպքի վայր է մեկնել ԱԻՆ ՓԾ Երևան քաղաքի փրկարարական վարչության հրշեջ-փրկարարական ջոկատի երկու մարտական հաշվարկ:

Ինչպես «Արմենպրես»-ին տեղեկացրին ՀՀ ԱԻՆ տեղեկատվության և հասարակայնության հետ կապերի վարչությունից, պարզվել է, որ հրդեհը բռնկվել է Երիտասարդական փողոցի 1-ին նրբանցքի թիվ 15 շենքի մոտակայքում գտնվող երկաթյա տնակում:

Հրդեհը մեկուսացվել է ժամը 19:13-ին, մարվել՝ 19:44-ին: Այրվել են տնակի ներսի փայտյա երեսպատումը՝ ամբողջությամբ, 1 սառնարան և 2 գազօջախ: