368.19
Մակունցը ներկայացրեց ԿԲ նախագահի պաշտոնում Մարտին Գալստյանի թեկնածությունն առաջադրելու պատճառը
2 րոպեի ընթերցում
ԵՐԵՎԱՆ, 16 ԱՊՐԻԼԻ, ԱՐՄԵՆՊՐԵՍ։ ՀՀ Ազգային ժողովի «Իմ քայլը» խմբակցության ղեկավար Լիլիթ Մակունցը կարևորում է ոչ միայն Կենտրոնական բանկի նախագահի թեկնածու Մարտին Գալստյանի մասնագիտական հմտությունները, այլ նաև հանրային ծառայությունը գերակա համարելը և տարիներ շարունակ, որպես ՀՀ քաղաքացի, դրսևորած կեցվածքը։ «Արմենպրես»-ի փոխանցմամբ` այս մասին Մակունցն ասաց ԿԲ նախագահի ընտրության հարցի քննարկման ժամանակ։
«Բացի մասնագիտական հմտություններից, ինձ համար շատ կարևոր է հանրային ծառայությունը գերակա համարելը և Մարտին Գալստյանի, տարիներ շարունակ, որպես ՀՀ քաղաքացի, դրսևորած կեցվածքը։ ԿԲ-ի անկախ և պրոֆեսիոնալ գործելու համար կարևոր են նաև հենց այս որակները։ Կան գերատեսչություններ, որտեղ նախագահ առաջադրելու ժամանակ մեզ համար չափազանց կարևոր է լինում ոչ միայն այն, թե ինչպիսի մասնագիտական որակներ ունեցող թեկնածու ենք առաջադրում, այլև կարևոր է այդ թեկնածուի հանրային ընկալումն ու մեր ընդդիմադիր գործընկերների կարծիքը։ Ինձ համար շատ ուրախալի էր տեսնել, թե ինչպիսի կառուցողական մթնոլորտում էր ընթանում հարցուպատասխանը»,- ասաց Լիլիթ Մակունցը։
Կենտրոնական բանկի նախագահի պաշտոնում առաջադրված է միայն Մարտին Գալստյանի թեկնածությունը։ Նրան այդ պաշտոնում ընտրելու համար առաջարկ է ներկայացրել «Իմ քայլը» խմբակցությունը։ Ընտրությունն անցկացվելու է Ազգային ժողովում` փակ և գաղտնի քվեարկությամբ։
Նորայր Շողիկյան
Բաժանորդագրվեք մեր ալիքին Telegram-ում