Օպերային երգչուհի Ռուզան Մանթաշյանը միացել է #ՇնորհակալությունԲուժաշխատող մարտահրավերին

ԵՐԵՎԱՆ, 15 ԱՊՐԻԼԻ, ԱՐՄԵՆՊՐԵՍ: Օպերային երգչուհի Ռուզան Մանթաշյանը, որն ամիսներ առաջ փայլուն ելույթ ունեցավ Դրեզդենի ամենամյա օպերային բալի բացման արարողությանը, միացել է Հայաստանի ազգային ֆիլհարմոնիկ նվագախմբի #ՇնորհակալությունԲուժաշխատող մարտահրավերին:

«Արմենպրես»-ի հաղորդմամբ՝ երգչուհին «Ֆեյսբուք»-ի իր պաշտոնական էջում տեսանյութ է զետեղել, որում ասում է, որ ընդունում է Ֆիլհարմոնիկ նվագախմբի հրավիրյալ ֆագոտահար Անդրեյ Շամիդանովի մարտահրավերն ու միանում է #ՇնորհակալությունԲուժաշխատող մարտահրավերին:

«Ես այժմ Ուկրաինայում եմ և տանն եմ: Դու նույնպես մնա տանն ու այդպիսով պաշտպանիր սիրելիներիդ և ցույց տուր երախտագիտությունդ բուժաշխատողին»,-նշում է Մանթաշյանն ու օպերային կատարում նվիրում բուժաշխատողներին:

Նա մարտահրավերը է նետում հայ օպերային երգչուհի Լիանա Ալեքսանյանին:

#ՇնորհակալությունԲուժաշխատող մարտահրավերը նախաձեռնել է Հայաստանի ազգային ֆիլհարմոնիկ նվագախումբը՝ փորձելով այս օրերին յուրովի երախտագիտություն հայտնել բժշկական ոլորտի ներկայացուցիչներին:

Մարտահրավերին միացել են երաժիշտներ Սևակ Ավանեսյանը, Միքայել Նավասարդյանը, Սիմոն Տռպչեսկին, Անդրեյ Շամիդանովը և այլք:

Անժելա Համբարձումյան