Կամերային երաժշտության կենտրոնը սբ Հարության տոնին առցանց կներկայացնի Կոմիտասի Բեռլինյան պատարագը

ԵՐԵՎԱՆ, 10 ԱՊՐԻԼԻ, ԱՐՄԵՆՊՐԵՍ: Կամերային երաժշտության ազգային կենտրոնը Սուրբ Հարության տոնին «Ֆեյսբուք»-ի իր պաշտոնական էջում կներկայացնի հատվածներ Կոմիտասի Բեռլինյան պատարագից՝ Երևանի պետական կամերային երգչախմբի կատարմամբ:

Դիրիժորը ԵՊԿԵ գեղարվեստական ղեկավար և դիրիժոր Հարություն Թոփիկյանն է:

«Արմենպրես»-ի հաղորդմամբ` առցանց հեռարձակումը հնարավոր կլինի դիտել ապրիլի 12-ին,ժամը 20:30-ին:

Ամեն ինչ սկսեց, երբ Կոմիտասն Ալեքսանդր Մանթաշյանցի կողմից 1896 թվականին ստացավ Բեռլինում ուսանելու կրթաթոշակ։ Նա սովորեց Ֆրիդրիխ Վիլհելմ համալսարանի (ներկայումս` Հումբոլդտ համալսարան) փիլիսոփայության բաժնում, և Ռիխարդ Շմիդտի մասնավոր կոնսերվատորիայում: Կոնսերվատորիայի 3-րդ կուրսում էլ գրեց հայտնի «Բեռլինյան պատարագը»: Պատարագը Կոմիտասի վաղ շրջանի լավագույն գործերից է: Երգասացությունները Կոմիտասն անձամբ է հայերենից գերմաներեն թարգմանել և համալրել «Շարակնոցից» և «Ժամագրքից» ընտրված տաղերով։

Անժելա Համբարձումյան